BURMA KE MUSALMANON KI HALATE ZAR

برماکے مسلمانوں کی حالتِ زار

عالمگیر آفریدی 

-’’برق گرتی ہے تو بیچارے مسلمانوں پر‘‘ کے مصداق آج ایک بار پھر ایک ایسی قوم اور مذہب کے پیروکاروں کی جانب سے روہنگیا (اراکان، برما) کے مسلمانوں کا خونِ ناحق بہایا جارہا ہے جنہیں فلسفۂ عدم تشدد کا پرچارک سمجھا جاتا ہے اور جن کی امن پسندی اور انسان دوستی کے قصیدے پڑھے جاتے ہیں۔ بدھ مت کے ان پیروکاروں نے گزشتہ دہائیوں کے دوران بالعموم اور گزشتہ دو ماہ کے دوران بالخصوص جس بڑے پیمانے پر برمی مسلمانوں کا قتل عام کیا ہے اس پر عالمی ضمیر کی پراسرار خاموشی اور ان تمام واقعات کو برما کا اندرونی معاملہ قرار دے کر مسلمان ممالک کا اس پوری صورت حال پر غیر جانبداری کا مظاہرہ کرنا باعثِ تشویش ہی نہیں قابلِ مذمت بھی ہے۔ روہنگیا کے مسلمانوں کی سب سے بڑی بدقسمتی یہ ہے کہ انہیں ایک طرف برما کی حکومت اپنے شہری ماننے کے لیے تیار نہیں ہے تو دوسری جانب بنگلہ دیشی حکومت بھی لٹے پٹے روہنگیا مسلمان خاندانوں کو اپنے ہاں اسلامی اور انسانی بھائی چارے کی بنیاد پر پناہ دینے میں لیت ولعل سے کام لے رہی ہے۔ روہنگیا مسلمانوں کی ایک بدقسمتی یہ بھی ہے کہ ان کی سرحد پر پاکستان جیسی کسی اسلامی نظریاتی مملکت کا وجود نہیں ہے۔ بظاہر تو روہنگیا کے مسلمانوں کے اکثریتی علاقے اراکان کی سرحد بنگلہ دیش سے لگی ہوئی ہے لیکن بنگلہ دیش حکومت نے اپنی روایتی طوطا چشمی اور اسلام دشمنی کا مظاہرہ کرتے ہوئے نہ صرف برما کے ساتھ اپنی سرحد مکمل طور پر سیل کررکھی ہے بلکہ اراکان اور بنگلہ دیش کے درمیان واقع خلیج بنگال میں بھی اپنے کوسٹ گارڈز کی تعداد میں اضافہ کرکے سمندر کے راستے اراکانی مسلمانوں کے بنگلہ دیش میں داخلے کے تمام بحری راستوں کو بند کردیا ہے۔ بنگالی حکومت کی اس بے حسی اور برما حکومت کی اس سفاکی اور انتہاپسندی کے باعث آٹھ لاکھ سے زائد روہنگیا مسلمانوں کی زندگیاں اور ان کی شناخت بہت بڑے المیے سے دوچار ہیں۔ غیر جانب دار بین الاقوامی رپورٹوں کے مطابق اب تک 20 ہزار سے زائد بے گناہ اور نہتے مسلمانوں کو تہہ تیغ کیا جاچکا ہے، ہزاروں مسلمان مائوں اور بیٹیوں کی عزتیں تار تار کی جاچکی ہیں، ہزاروں بچے یتیم اور ہزاروں خواتین بیوہ بنادی گئی ہیں، مسلمان نوجوانوں کو چن چن کر ہلاک کیا گیا ہے، مسلمان بستیوں کو فوج اور پولیس کی نگرانی میں آگ لگا کر خاکستر کیا گیا ہے۔ حقیقت یہ ہے کہ روہنگیا مسلمان بے بسی اور مایوسی کی عملی تصویر بنے ہوئے ہیں۔ اولاً تو انہیں اپنا قصور معلوم نہیں ہے کہ انہیں کس جرم میں مارا جارہا ہے، ثانیاً پوری مہذب دنیا بالخصوص اقوام متحدہ اور عالم اسلام اس سفاکی اور انسانیت سوز مظالم پر خاموش تماشائی بنے ہوئے ہیں۔ سوال یہ ہے کہ آخر روہنگیا کے مسلمانوں کا جرم کیا ہے جس کی انہیں اتنی بڑی سزا دی جارہی ہے! روہنگیا کے مسلمانوں کی تاریخ بتاتی ہے کہ یہ مسلمانوں کی وہ نسل ہے جو انتہائی امن پسند اور غیر متشدد واقع ہوئی ہے۔ ان سے اب تک ایسی کوئی بات یا واقعہ منسوب نہیں جس کی بنیاد پر ان کے خلاف تاریخِ جدید کی مغربی اصطلاحات یعنی تشدد پسندی، انتہا پسندی یا عسکریت پسندی کا الزام لگایا جاسکے۔ روہنگیا مسلمانوں کے بارے میں کہا جاتا ہے کہ یہ لوگ یہاں نویں صدی عیسوی میں آباد ہوئے۔ برما کی حکومت نے شروع دن سے ان علاقوں کی ترقی اور ملکی معاملات میں ان کی شمولیت سے گریز کی پالیسی اپنائی، جس سے یہ علاقے نہ صرف انتہائی پسماندگی سے دوچار ہوئے بلکہ برما کی قومی وحدت کا حصہ بننے سے بھی محروم رہے۔ سانحہ سقوطِ ڈھاکا تک روہنگیا کے مسلمان کسی نہ کسی طرح مشرقی پاکستان کے ساتھ اپنے رشتے ناتے بر قرار رکھنے میں کامیاب رہے، لیکن بنگلہ دیش کے قیام کے بعد چونکہ وہاں خالص بنگلہ قوم پرست سیکولر عناصر چھا گئے اس لیے اُن کی جانب سے روہنگیا مسلمانوں کی پشت پناہی اور تعاون سے ہاتھ کھینچ لیا گیا، اس کے علاوہ ان کے خلاف برمی حکومت کی درخواست پر بعض سخت اقدامات بھی اٹھائے گئے۔ برما کے مسلمانوں کا قضیہ سیاسی اور انسانی المیے کی شکل اختیار کرچکا ہے۔ روہنگیا مسلمانوں کا سب سے بڑا مسئلہ قیادت کا فقدان ہے۔ اگر انہیں ایک مؤثر قیادت دستیاب ہوجاتی ہے اور پوری کمیونٹی اتفاق واتحاد کا مظاہرہ کرتے ہوئے اپنی قیادت کے پیچھے کھڑی ہوجاتی ہے تو تمام تر مسائل اور مشکلات کے باوجود وہ نہ صرف دنیا سے اپنا وجود منوانے میں کامیاب ہوسکتے ہیں بلکہ اپنے ساتھ ہونے والے مظالم کو دنیا کے سامنے لاسکتے ہیں اور ان مظالم کے خلاف پُرامن سیاسی جدوجہد کے ساتھ مسلح مزاحمت کا مسلمہ حق بھی استعمال کرسکتے ہیں۔ روہنگیا کے مسلمان اقوام متحدہ کی ہر تعریف کی رو سے نہ صرف اپنا ایک الگ مذہبی، لسانی اور قومی تشخص رکھتے ہیں بلکہ برمی حکومت کے مظالم کے خلاف انہیں اپنی بقا، خودمختاری، حتیٰ کہ آزادی کا بنیادی حق بھی حاصل ہے۔ برما کے مسلمان ویسے تو کئی حوالوں سے بدقسمت اور لاچار واقع ہوئے ہیں، لیکن ان کے ساتھ اسلامی ممالک نے جس بے رخی اور بے مروتی کا مظاہرہ کیا ہے وہ یقینا دنیا بھر کے مسلمانوں کے لیے لمحۂ فکریہ ہے۔ عالم اسلام کے حکمران جو امریکی تابعداری میں ایک دوسرے پر سبقت لے جانے کے لیے ہمہ وقت تیار رہتے ہیں، اور جو امریکی شہہ پر اپنے ہی مسلمان شہریوں اور برادر اسلامی ممالک کے خلاف مسلح جارحیت سے بھی دریغ نہیں کرتے ان کی جانب سے روہنگیا کے مسلمانوں کے قتل عام پر خاموشی اور اس ضمن میں اب تک اسلامی کانفرنس تنظیم کے حرکت میں نہ آنے سے اس بے جان اور بے روح تنظیم نے اپنی نااہلی اور اسلام دشمنی ایک بار پھر ثابت کردی ہے۔ سعودی عرب، ترکی،انڈونیشیائ، بنگلہ دیش اور پاکستان جیسے بڑے اسلامی ممالک کی روہنگیا کے مسلمانوں کے قتل عام پر خاموشی اور ان مظالم کے خلاف اپنی اپنی حکومتوں کی سطح پر آواز بلند نہ کرنے سے عام مسلمانوں میں اپنے بے ضمیر اور بے حس حکمرانوں کے خلاف نفرت اور انتقام کے جذبات میں یقینا اضافہ ہوگا۔ امریکا کو چین، ایران اور شمالی کوریا وغیرہ میں انسانی اور مذہبی حقوق پامال ہونے پر تو ہر وقت تشویش لاحق رہتی ہے لیکن اس کی جانب سے روہنگیا کے مسلمانوں کے قتل عام پر خاموشی اُس کی روایتی اسلام دشمنی کا منہ بولتا ثبوت ہے۔ برما کے مسلمانوں کی نسل کشی پر اب تک اقوام متحدہ نے جو منفی کردار ادا کیا ہے اُس نے ایک بار پھر یہ بات ثابت کردی ہے کہ اقوام متحدہ کا کام محض امریکی مفادات کی تکمیل ہے۔ امریکہ کو جب بھی اپنے مفادات کے لیے کسی اسلامی ملک کے خلاف ننگی جارحیت کا مرحلہ درپیش ہو تاہے وہ اقوام متحدہ کی چھتری استعمال کرکے پوری دنیا کو دھونس اور طاقت سے اپنے ساتھ ملا کر اسلامی ممالک کے خلاف تباہی و بربادی کا محاذ کھول دیتا ہے۔ عراق، افغانستان، صومالیہ، لیبیا، شام، سوڈان اور یمن اس کی نمایاں مثالیں ہیں۔ اقوام متحدہ کے دوغلے اور منافقانہ کردار کا اندازہ اس کی جانب سے انڈونیشیا اور سوڈان میں عیسائی اکثریتی علاقوں مشرقی تیمور اور جنوبی سوڈان میں وہاں کی حکومتوں کی مرضی اور منشا کے خلاف دو آزاد عیسائی ریاستوں کے قیام میں امریکی باندی کا کردار ادا کرنا ہے۔ اقوام متحدہ کو فلسطین اور        کے 65سال پرانے تنازعات تو نظر نہیں آتے لیکن مشرقی تیمور اور جنوبی سوڈان کے تنازع کو راتوں رات حل کردیا جاتا ہے۔ روہنگیا کے مسلمانوں پر ڈھائے جانے والے مظالم کی روک تھام اور وہاں انسانی ہمدردی کی بنیاد پر امدادی سرگرمیوں کا آغاز، نیز وہاں کے مسلمانوں کو ان کے مذہب اور رسم و رواج کے مطابق عزت و آبرو کی زندگی گزارنے کے مواقع فراہم کرنا نہ صرف اقوام متحدہ کا فرض ہے بلکہ یہ اس کے مینڈیٹ کا بنیادی تقاضا بھی ہے۔ لہٰذا اگر اقوام متحدہ خود پر سے جانبداری اور اسلام دشمنی کا لیبل اتارنا چاہتی ہے تو اسے جہاں دیگر اسلامی خطوں کے مسائل پر توجہ دینا ہوگی وہیں روہنگیا کے مسلمانوں کی دادرسی اور ان کے زخموں پر مرہم رکھنے کے لیے بھی آگے بڑھ کر اپنا نام نہاد عالمی کردار ادا کرنا ہوگا۔

عید کی خوشیاں

-عبدالجبار خان ’’اجی! آج اکیسواں روزہ تھا۔ عید سر پر ہے، بچے کہہ رہے تھے نئے کپڑے بنوانے ہیں، جوتے اور دوسرا سامان بھی لینا ہے۔‘‘ غلام رسول صاحب گھر آئے تو افطاری کے بعد ’’بیگم رانی‘‘ نے بچوں کی فرمائشیں پیش کردیں۔ ’’ہاں رانو! آپ کو تو ابھی خیال آیا ہے اور مجھے پہلے روزے سے ہی اس کی فکر تھی۔ تمہیں تو معلوم ہے کہ میں ایک معمولی پولیس ملازم ہوں، تنخواہ سے بمشکل دال روٹی چلتی ہے، کوشش تو بہت کی کچھ بچت ہوجائے لیکن…‘‘ غلام رسول کی آواز بھر آئی… لفظ ’’لیکن‘‘ کے بعد جو کچھ غلام رسول کہنا چاہ رہے تھے، بیگم اُسے اچھی طرح سمجھ گئی تھیں۔ غلام رسول محکمہ پولیس کے ایک معمولی ملازم تھے، رشوت سے کوسوں دور، ہمیشہ ایک ایک پائی میں حلال کا خیال رکھتے تھے، تبھی تو آج عید کے کپڑوں کے لیے رقم کا بندوبست نہیں ہورہا تھا… ’’تو پھر کوئی انتظام ہوسکتا ہے؟‘‘ بیگم، کرسی کھینچ کر بیٹھ گئیں اور کپ میں چائے ڈالنے لگیں… انتظام! غلام رسول کے کانوں میں دوستوں کی آوازیں گونجنے لگیں، رفیق کہہ رہا تھا: ’’یار آج جیک لگ گیا ہے، پورے 25 ہزار لے کر ’’کالو خان‘‘ کو فرار کردیا ہے، کسی کو کانوں کان خبر نہ ہوئی۔ ذوالفقار بتارہا تھا ’’اس دفعہ تو اپنی عیدی بن ہی گئی ہے، پوری ایک کلو چرس شیدے پہلوان سے برآمد ہوئی تھی، دس ہزار وصول کرکے چھوڑ دیا۔‘‘ ندیم کیسے پیچھے رہتا، بولا: ’’آج ایک آدمی سے میں نے موبائل چھین لیا، آخر پولیس کی وردی میں تھا، بے چارہ کانپ گیا، شریف صورت آدمی تھا، بہت منتیں کیں اور پھر چپ ہوکر اپنی راہ لی، پورے چھ ہزار کا بیچا ہے، ایسے دو چار اور شریف ہاتھ لگ گئے تو اپنی عیدی پکی۔‘‘ رشوت، بدعنوانی، فراڈ، لوٹ مار… نہیں نہیں، ہرگز نہیں، یہ نہیں ہوگا، اللہ کو منہ دکھانا ہے… غلام رسول دوستوں کی باتیں سوچ کر بری طرح جھنجھلا گیا۔ ’’کیوں نا ہم قرض لے لیں، تنخواہ میں تھوڑا تھوڑا بچا کر واپس کردیںگے‘‘ بیگم نے رائے دی۔ ’’رانو بیگم! عید قریب ہے، مہنگائی آسمان سے باتیں کررہی ہے، کس کے پاس اتنی رقم ہے جو ہمیں قرض دے گا!‘‘ غلام رسول کے چہرے سے مایوسی نمایاں تھی… ’’آخر کوشش کرنے میں کیا حرج ہے‘‘… ’’اچھا بیگم! آج ایک آدمی کے پاس جاتا ہوں، کافی کھاتا پیتا ہے، امید ہے قرض دے دے گا۔‘‘ ………٭……… ’’سلطان صاحب! آپ کو پتا ہے کہ میں ایک معمولی ملازم ہوں، عید سر پر ہے، بچوں کے کپڑے بنوانے ہیں، کچھ رقم قرض کے طور پر چاہیے۔‘‘ ’’جناب والا! واپس کب کرو گے؟‘‘ ’’سلطان جی! آئندہ ماہ جو تنخواہ ملے گی، آپ کا قرض چکا دوں گا۔‘‘ سلطان نے اپنے دونوں پائوں ٹیبل پر دراز کیے اور سگریٹ کا ایک بڑا کش لگاتے ہوئے دھواں سامنے بیٹھے غلام رسول کی طرف پھونکا اور کہا: ’’غلام رسول! زندگی اور موت کا کیا بھروسا، تم آئندہ ماہ تک زندہ رہنے کا تحریری ثبوت دے دو، میں تمہیں رقم دے دیتا ہوں۔‘‘ یہ سلطان وہی تھا، جس نے ایک مرتبہ غلام رسول کو ایک ناجائز کام کرانے کے عوض رشوت کی پیش کش کی تھی اور غلام رسول نے انکار کردیا تھا، آج اس نے پورا پورا بدلہ لیا تھا۔ غلام رسول کی زبان گنگ ہوگئی۔ وہ الٹے پائوں گھر واپس آگیا۔ ’’جی رقم کا بندوبست ہوا؟‘‘ بیگم نے امید بھری نظروں سے غلام رسول کو دیکھا۔ ’’نہیں بیگم! بچوں سے کہہ دو کہ تمہارا باپ تمہیں عید کے لیے نئے کپڑے بنواکر نہیں دے سکتا۔‘‘ غلام رسول چارپائی پر بیٹھا منہ دیوار کی طرف کیے ہوئے تھا اور ڈھیر سارے بے بسی کے آنسو اس کی خالی جھولی کو تر کررہے تھے۔ آخر پرانے کپڑوں میں ہی غلام رسول اور اس کے بچوں نے عید کی نماز ادا کی۔ گھر آئے تو سب سے پہلے بڑا بیٹا ابوہریرہ باپ سے ملنے آیا: ’’ابا جان! عید کی ڈھیروں خوشیاں مبارک ہوں۔‘‘ بیٹے کو عید والے دن پرانے کپڑوں میں دیکھ کر غلام رسول اپنے آنسو ضبط نہ کرسکا اور بولا: ’’بیٹا! تم کہتے ہو گے کہ باپ کتنا ظالم ہے، ہمیں عید والے دن بھی نئے کپڑے بناکر نہیں دے سکا۔‘‘ سعادت مند بیٹا جس کی رگوں میں حلال کمائی کا خون دوڑ رہا تھا، بڑے تحمل سے بولا: ’’نہیں ابا جان! آج ہمارا سر فخر سے بلند ہے کہ ہمارے باپ نے لوگوں کے مال میں خیانت نہیں کی، کبھی رشوت نہیں لی، لوٹ مار اور فراڈ نہیں کیا، ہمیشہ ہمیں حلال اور پاکیزہ لقمہ کھلایا۔ ابا جان! ہم آپ کی اس ایمان داری اور جرأت کو سلام کرتے ہیں۔‘‘ ’’شاباش میرے بچو! مجھے تم سے اسی جواب کی امید تھی۔‘‘ یہ سعادت مند گھرانہ دسترخوان پر بیٹھا دودھ والی سویاں کھاتے ہوئے عجب لطف محسوس کررہا تھا اور ساتھ ساتھ خوش گپیوں میں بھی مصروف تھا۔ اب ہر طرف مسکراہٹ ہی مسکراہٹ تھی، کیونکہ ان لوگوں نے عید کی حقیقی خوشیاں پالی تھیں۔

یہ دنیا چھوڑ جانا ہے

-کوثر مسعود ’’دل غافل نہ ہو، یہ دنیا چھوڑ جانا ہے۔‘‘ یاددہانی کے یہ الفاظ میں نے اپنی پیاری فریدہ آپی کی ڈائری کے صفحات پلٹتے ہوئے پڑھے۔ میرے دل کی دنیا عجیب ہوگئی اور آنکھوں میں آنسو آگئے۔ یہ الفاظ انہوں نے لکھے تھے اور خود دنیا چھوڑ کر جاچکی تھیں۔ اللہ نے انہیں نوازا تھا، ہر طرح کی آسائش عطا کی تھی، اور وہ اس میں سے اللہ کا حصہ نکالتی تھیں۔ اپنا وقت‘ اپنی صلاحیتیں‘ مال… سب کچھ اللہ کی راہ میں خرچ کرتی تھیں۔ پروگرامات کے انتظامات‘ الخدمت کی ذمہ داری‘ مدرسہ کی ذمہ داری، گاڑیوں کو شیڈول کے مطابق افراد کے پاس بھیجنا اور دیگر کئی کام سب کچھ اس طرح کرتی تھیں کہ کبھی محسوس نہ ہونے دیتیں کہ وہ کس طرح اتنے کام خاموشی سے کرلیتی ہیں۔ ہمیشہ مسکراکر ملنا‘ ایثار کرنا ان کا طریقہ تھا‘ یعنی عمارت کی ان اینٹوں میں سے تھیں جو زیرزمین ہوتی ہیں مگر جن کی وجہ سے عمارت مضبوط ہوجاتی ہے۔ ہمارے لیے گھنا سایہ تھیں۔ کوئی مسئلہ ہو، آپی سے کہہ دینا ہی کافی ہوتا تھا۔ کوئی مشورہ لینا ہو‘ شعبے کے لیے مالی مدد لینی ہو، بڑے اطمینان سے فون کرتے اور کام ہوجاتا۔ آپی کی عنایتیں ملتی تھیں اور میں اسے اپنا حق سمجھ کر لیتی تھی۔ کبھی سوچا بھی نہیں تھا کہ یہ نعمت چھن بھی سکتی ہے۔ اکثر اپنے ہاتھ سے بنائے ہوئے اچار‘ چٹنی بھیجتی تھیں۔ پورے دن کے اجتماع میں مَیں کبھی کھانا ہمراہ لے جانے کے بارے میں نہیںسوچتی تھی، کیونکہ آپی جو ہوں گی، وہ میرے حصے کا بھی لے کر آتی تھیں، مجھے تلاش کرتیں، دسترخوان پر بٹھاتیں۔ ان کے انتقال سے پہلے جو آخری اجتماعِ ارکان کراچی کی سطح کا ہوا اس میں وہ مجھے نہیں ملیں۔ مجھے یکایک خیال آیا کہ آپی ابھی تک میرے پاس نہیں آئیں۔ میں نے فون کیا: آپی آپ نے کھانا کھالیا؟کہنے لگیں: ہاں۔ میں نے پوچھا: آپ کہاں ہیں؟ بتایا: میں گھر پر ہوں، ڈاکٹر نے ریسٹ بتایا ہے۔ خود سے کبھی بیماری کا تذکرہ بھی نہیں کرتی تھیں۔ اس ریسٹ کے دوران بھی گھر کے جملہ امور انجام دیتی رہیں۔ انٹرکام اور فون اٹھانے اور دروازہ کھولنے کے لیے جانے پر میں نے کہا کہ آپ کو ڈاکٹر نے ریسٹ بتایا ہے، تو خفگی سے کہنے لگیں کہ کیا بالکل بستر پر بیٹھی رہوں! کہا: کم از کم آرام دہ پوزیشن میں تو بیٹھیں، ٹیک لگالیں۔ کہتیں: ٹھیک بیٹھی ہوں۔ بعد میں بیٹی نے بتایا کہ کمر میں اتنا درد تھا کہ کسی طرح آرام نہیں مل رہا تھا۔ میں نے کہا کہ ہم اتنی دیر ساتھ بیٹھے، انہوں نے ذکر تک نہ کیا کہ کہیں تکلیف ہے۔ آپریشن کی تاریخ ملنے کے بعد اجتماع ناظمات میں جاکر سارے حسابات کیے، الخدمت کی ذمہ د اری کے تحت جو امدادی رقوم دینی تھیں وہ دیں، کسی پر اظہار نہ کیا کہ بیمار ہیں۔ انتقال پر آنے والی بہنیں یہ کہہ رہی تھیں کہ ہمیں تو پتا ہی نہیں تھا بیماری کا ‘ ابھی چند دن پہلے تو ہم ملے تھے۔ کچھ تو یہی گمان کررہی تھیں کہ خبر غلط ہے۔ آپی کا لقب انہیں گھر کے علاوہ جماعت کی بہنوں نے بھی دے رکھا تھا۔ تمام کارکنان فریدہ آپی کہتی تھیں، اور وہ سب کی آپی ہی تھیں۔ ان کا تعلق سب سے بڑی بہن کا سا ہی تھا۔ کبھی کہتیں: مجھے تو ڈرائیور بھی آپی کہتے ہیں۔ بیرونِ شہر سے آنے والی بہنوں کو ٹھیرانے کی ضرورت پیش آتی تو میں ان سے پوچھے بغیر ہی ان کے گھر ٹھیرانے کی ہامی بھرلیتی، اور پھر ان کو اطلاع دیتی کہ اتنے مہمان آئیں گے، اتنے دن ٹھیریں گے۔ وہ خوشدلی سے سن کر انتظامات کردیتیں۔ ان کی نمایاں خوبیوں میں سے ایک یہ بھی تھی کہ کبھی شکوہ شکایت نہیں کرتی تھیں۔ بہنوئی کے انتقال کے بعد یہ فکر تھی کہ آپی کیسے اپنے آپ کو سنبھالیں گی، کیونکہ بہنوئی بہت خیال رکھنے والے تھے، آپی کے سارے کام وہی کرواتے تھے۔ شاپنگ ہو، ڈاکٹر کے پاس جانا ہو، کبھی آپی تنہا نہیں جاتی تھیں۔ مگر ان کے بعد آپی نے کبھی شکوہ نہیں کیا، نہ اپنی تنہائی کا، نہ اور کسی بات کا۔ انہوں نے دین کے کاموں میں خود کو مصروف کرلیا۔ دوسروں کے ساتھ درگزر کا معاملہ کرتی تھیں، جو ماسی ان کے پاس تھی اس کا بہت خیال رکھتی تھیں، جب بھی اس کا ذکر کرتیں تعریفی الفاظ ضرور کہتی تھیں۔ ان کے بعد ماسی کہنے لگی کہ میں 11 سال باجی کے پاس رہی، باجی نے مجھے کبھی جھڑکی نہیں دی۔ اس پر مجھے نبی صلی اللہ علیہ وسلم کا اسوہ یاد آگیا، حضرت انسؓ کہتے تھے کہ میں 10 سال حضور صلی اللہ علیہ وسلم کی خدمت میں رہا اور انہوں نے مجھے کبھی یہ نہ کہا کہ تم نے یہ کام کیوں نہ کیا۔ اسی طرح ڈرائیوروں کے ساتھ معاملہ تھا۔ ضلع کی گاڑیوں کو شیڈول کے مطابق بھیجنے کی ذمہ داری تھی۔ ڈرائیور ڈیوٹی کے لیے ان ہی کو فون کرتے۔ دن بھر میں بے شمار فون اس کام کے لیے ہوجاتے، مگر خندہ پیشانی سے نبھاتیں۔ ایک ڈرائیور کہنے لگے: ان کے بعد تو ہم یتیم ہوگئے، میری بچی ان ہی کی وجہ سے تعلیم حاصل کررہی ہے، انہوں نے ہی اسے داخل کروایا تھا، اب وہ نویں جماعت میں ہے۔ الخدمت کے شعبے کی ضروریات پوری کرنے کے لیے ملاقاتیں کرتیں، فنڈنگ کرتیں، قرض حسنہ کی درخواستیں آتیں ان کے لیے علیحدہ انتظام کرتیں۔ ایک علیحدہ فنڈ بنایا ہوا تھا جو صرف قرض حسنہ دینے میں استعمال ہوتا تھا۔ تمام حسابات کا ریکارڈ بہترین طریقے سے درج کرتیں۔ اسپتال جانے سے پہلے سارا ریکارڈ درست کرکے اپنی نائب کے حوالے کرکے گئیں۔ بزرگ تحریکی ساتھیوں کو پروگرامات میں یا دیگر کسی ملاقات وغیرہ کے لیے لے کر جانا‘ رسائل تقسیم کروانا… یہ سب اپنی ذمہ داری بنا رکھا تھا۔ وہ تحریکی بہنیں آنسوئوں کے ساتھ کہتی ہیں کہ اب سمجھ میں نہیں آتا کہ کس سے کہیں، وہ تو خود فون کرکے پوچھتی تھیں :آپ نے چلنا ہے؟ یہ ساری نیکیاں، گواہیاں ان شاء اللہ بارگاہِ الٰہی میں قبول ہوں، اور رب ان کو بڑھا چڑھا کر اجر عطا فرمائے۔ آمین

مہلت عمل

-فرحین رفیع اس نے دیکھا ایک قطار میں تین کرسیاں رکھی ہوئی تھیں۔ بہت سے لوگ جمع تھے جو باری باری ان کرسیوں پر بیٹھتے تھے اور پھر چند ہی لمحوں میں ایک جہاں سے دوسرے جہاں میں پہنچ جاتے تھے۔ ہر شخص ان کرسیوں پر بیٹھتے ہوئے ہچکچا رہا تھا۔ بیٹھنا نہ چاہتے ہوئے بھی بیٹھنا پڑرہا تھا، کیونکہ آس پاس کچھ لوگ تھے جو ہر ایک کو اس کی باری پر زبردستی بیٹھنے پر مجبور کررہے تھے۔ چاہے کوئی کتنا ہی روتا‘ التجا کرتا مگر ان لوگوں کے آگے بے بس ہوکر رہ جاتا تھا۔ اس نے دیکھا کہ اس کی بہن اس سے آگے ایک کرسی کے قریب ہے اور اب اسے بیٹھنا ہی تھا، مگر وہ گھبرا کے رک گئی اور اس کی طرف پُرامید نظروں سے دیکھنے لگی۔ اس نے بس ایک لمحہ سوچا اور پھر اپنی بہن سے آگے بڑھ کر اس کی جگہ پر خود آگئی۔ بہن نے شکر گزار نظروں سے اسے دیکھا، مگر اس نے سوچا اس میں کیا بڑی بات ہے! بیٹھنا تو سب کو ہی ہے، اس کی بہن مزید کتنے لمحے بچ سکے گی! سب کو بالآخر یہ جگہ چھوڑنی ہی ہے۔ مگر کرسی پر بیٹھتے بیٹھتے اس کا دماغ چکرا گیا، اس کے سامنے اس کی پوری زندگی ایک کھلی کتاب کی طرح آگئی، وہ سوچنے لگی کہ جب یہ سفر ختم ہوگا اور اسے اگلے جہاں پہنچادیا جائے گا تو کیا ہوگا! اتنی دیر میں اس کی نظر چند اشخاص پر پڑی جو بڑے بڑے رجسٹر تھامے ایک سرے سے دوسرے سرے پر جارہے تھے‘ بڑی جلدبازی میں تھے۔ یکایک ایک جھماکا سا ہوا۔ اسے ایک رجسٹر پر اپنا نام نظر آیا، مگر وہ خوف سے کانپ گئی۔ اس کا رجسٹر ناکام لوگوں کی لسٹ کے ساتھ تھا۔ وہ جھانک کر دیکھنے لگی۔ مگر یہ کیا، کئی صفحات تو بالکل خالی تھے۔ وہ دل تھام کے رہ گئی۔ اے کاش کچھ ایساکام کیا ہوتا کہ یہ پرچے خالی نہ جاتے، کچھ نمبر تو ہر صفحے پر مل جاتے۔ کاش کچھ ایسا کیا ہوتا! اس کی پچھلی زندگی اس کے سامنے ایک فلم کی طرح آگئی کہ کس طرح اس نے اتنا وقت ضائع کیا جبکہ اسے بہت اچھی طرح علم تھا کہ یہ زندگی چند روزہ ہے، کھیل تماشے میں برباد کرنے کے لیے نہیں بلکہ اسے اس مہلت سے پورا پورا فائدہ اٹھانا چاہیے تھا۔ جابجا، قدم قدم پہ نیکیاں بکھری ہوئی تھیں، اسے بس سمیٹ کر اپنے پاس جمع کرنا تھا۔ اسے معلوم تھا کہ اس کے یہ ہاتھ پائوں بھی اس کے خلاف گواہی دے سکتے ہیں، اس لیے انہیں نیکی کے کاموں میں ہی لگانا بہتر ہے۔ مگر افسوس ہائے افسوس کہ سب کچھ جانتے ہوئے بھی وہ شیطان کے بہکاوے میں آگئی۔ سوچتی، بس کچھ دیر اور زندگی سے لطف اندوز ہولوں‘ اس کی لذتوں سے فائدے اٹھالوں، پھر اچھی طرح توبہ کرکے نیک زندگی بسر کرلوں گی۔ مگر یہ کیا کہ یہ وقت اتنی جلدی آگیا۔ یاد آیا کہ اس نے یہ بھی پڑھا ہوا تھا کہ وہ وقت اچانک ہی آجائے گا اور اس کو ہر گھڑی اس وقت کے لیے تیار رہنا چاہیے تھا۔ اس کے آس پاس ہلچل سی ہوئی۔ اسے لگا کہ وہ بس اب جارہی ہے اپنے رب ذوالجلال کے پاس، جس سے وہ کچھ بھی نہ چھپا سکے گی… کوئی بہانہ‘ کوئی افسانہ نہ گھڑسکے گی… اور پھر شاید…اچانک اس کی آنکھ کھل گئی۔ وہ ہڑبڑا کے اٹھ گئی۔ اسے یقین ہی نہیں آرہا تھا کہ یہ سب ایک خواب تھا… اتنا بھیانک خواب! کافی وقت لگا اسے سنبھلنے میں، مگر جب یقین ہوگیا تو خوشی سے اس کی چیخ نکل گئی: ’’او خدایا تیرا شکر ہے۔ تیرا لاکھ لاکھ احسان ہے کہ میری مہلتِ عمل ابھی ختم نہیں ہوئی، ابھی وقت ہے میرے پاس… اب میں ان شاء اللہ اس وقت نہیں پچھتائوں گی جب وقت ِآخر قریب ہوگا۔ ہاں ان شاء اللہ میں اپنی مہلتِ عمل ضائع نہیں کروں گی۔‘‘

احوال پاکستان  

یہاں صرف قحط رجال ہے

 

-علی خان آموں کا موسم ہے اور جن کی جیب میں پیسے ہیں وہ کھا بھی رہے ہیں۔ ورنہ تو رمضان المبارک میں ہر پھل کی قیمت اتنی بڑھ گئی ہے کہ دام پوچھنے کی ہمت ہی نہیں ہوتی، ٹھیلے والے کے پاس سے گزر جائو تو بھی وہ صرف نظر ڈالنے کے پیسے مانگ بیٹھتا ہے۔ ہمارے پنجاب میں نعمتوں کے اس ماہِ مبارک میں کیلا 300 روپے درجن بک رہا ہے۔ انگور کا ایک دانہ ایک روپے میں پڑتا ہے۔ وقت آنے والا ہے جب انگور فی دانہ کے حساب سے بکے گا۔ آموں کے بارے میں یاد آیا تو مرزا غالب یاد آگئے جنہوں نے آم کی دو خوبیاں بیان کی تھیں۔ ’’میٹھے ہوں اور بہت سے ہوں۔‘‘ آم بہت سے ہیں اور میٹھے بھی ہوں گے لیکن بیچنے والے دام مانگیں ہیں اور جیب میں پائی نہیں۔ اس پر ڈاکٹر اور حکیم تاکید کرتے ہیں کہ رمضان کریم پھل زیادہ سے زیادہ کھائیں۔ ہمارے حکمرانوں کا خدا بھلا کرے۔ عوام کی تکلیف دیکھ کر پورا ملک ہی بیچنے پر تلے ہوئے ہیں کہ چار پیسے ہی آئیں گے۔ ہمارے رینٹل راجا نے اپنے حلقے میں بجلی کی بلا تعطل فراہمی کا بندوبست کردیا ہے اور ان کے حلقہ انتخاب کے لوگ بتا رہے تھے کہ بجلی چوبیس گھنٹے دستیاب ہے، اگر کسی فنی خرابی کی وجہ سے جاتی بھی ہے تو چار، پانچ منٹ میں شرمندہ ہو کر خود ہی واپس آجاتی ہے جیسے کوئی دوشیزہ کسی کے بہکاوے میں آکر گھر سے باہر قدم رکھے اور ماں باپ کی عزت کا خیال آتے ہی نکڑ سے پلٹ آئے۔ تاہم اسی حلقے کے ایک صاحب فرما رہے تھے کہ بجلی کوئی کھانے، پینے کی چیز تو نہیں، راجا رینٹل کھانے، پینے کی چیزیں سستی کروائیں۔ راجا صاحب بھی کہتے ہوں گے کہ کیسے ناشکرے ہیں، ملک بھر میں لوگ بجلی کو ترس رہے ہیں اور میں نے اپنے حلقے کے لوگوں کو یہ عیاشی فراہم کردی تو اب کھانے کو مانگتے ہیں۔ وہ راجا رینٹل ہیں۔ ’’راجا کریانوی‘‘ نہیں۔ کھانے، پینے کا شعبہ دوسرا ہے اور وہ یہ کام کیے جارہا ہے۔ اسی لیے سلالہ کے شہیدوں کا سودا کردیا گیا ہے تاکہ کچھ ڈالر مل جائیں اور عوام کے کام آئیں۔ یہ بھی حسب معمول ملک وقوم کے وسیع تر مفاد میں کیا گیا ہے لیکن نادان سمجھتے ہی نہیں ہیں۔ اب دیکھیے ناں کہ سلالہ ہی نہیں افغانستان میں امریکی دہشت گردی کے نتیجے میں اپنی جان سے گزرنے والے تین ہزار فوجی اور 32 ہزار عوام کی لاشوںکا سودا کرنا کوئی آسان بات نہیں تھی۔ یہ کام صرف اور صرف عوام اور ملک کی خاطر کیا گیا۔ لیکن عوام اس الجھن میں ہیں کہ امریکا سے اب تک ملنے والی امداد ان تک کیوں نہیں پہنچی، راستے میں کہاں رہ گئی، کس کی جیب بھاری ہوئی۔ ایسے سوالات احمقانہ ہیں۔ کہتے ہیں کہ ’’گھی کہاں گیا؟ کھچڑی میں، اور کھچڑی کہاں گئی؟ پیاروں کے پیٹ میں۔ امریکی ڈالر کسی کے پیٹ میں بھی گئے ہوں، اپنوں ہی کے پاس تو آئے۔ ہمیں اچھی طرح یاد ہے کہ جب ہم بہاولپور کے صادق ڈین ہائی اسکول میں پڑھتے تھے تو امریکی امداد ہم تک بھی پہنچی تھی۔ امریکا سے تحفہ، امداد یا خیرات میں خشک دودھ آتا تھا جس کے جواب میں ہمارے حکمرانوں نے Thank you America کے پرچم لہرا دیے تھے۔ یہ امریکی دودھ سب طالبانِ علم کو کاغذ کے ٹکڑے پر ملا کرتا تھا۔ کاغذ پاکستان کا اپنا ہوتا تھا گو کہ بنتا مغرب ہی میں تھا یا مرحوم مشرقی پاکستان کے کھلنا پیپر مل سے آتا تھا۔ ہم گھر جاتے ہوئے اس دودھ کو چاٹتے اور امریکا سے محبت اور احسان مندی کے جذبات سے سرشار ہوتے چلے جاتے۔ اس طرح بہت سے بچے اپنی مائوں سے دودھ بخشوانے کی زحمت سے بچ گئے۔ حضرت اکبر الہ آبادی نے اس سے بہت پہلے کہہ دیا تھا کہ ’’دودھ تو ڈبے کا ہے اور تعلیم سرکار کی۔‘‘ ان کا کہنا تھا کہ اس طرح طفل میں ماں، باپ کی خو کہاں سے آئے گی۔ یہ نظر بھی آرہا ہے کہ ہم میں ساری خو، بو امریکا اور مغرب کی ہے۔ ہم اس فکر میں ہیں کہ امریکا کا دودھ ’’کھانے‘‘ والے اس سے دودھ کیسے بخشوائیں گے۔ جو لوگ امریکا کے سامنے ہاتھ باندھے کھڑے ہیں انہوں نے شاید یہ دودھ ہم سے زیادہ کھا لیا ہے اور اب بخشوا رہے ہیں، بخشش میں پورا ملک ہی دے ڈالا ہے مگر امریکا اب بھی بخشنے کو تیار نہیں۔ مرزا غالب والی بات تو رہ ہی گئی۔ انہوں نے کہا تھا کہ آم میٹھے ہوں اور بہت سے ہوں۔ یہ ہمیں یوں یاد آیا کہ ایک صاحب ہوتے ہیں مظفر اعجاز۔ جسارت میں کالم لکھتے ہیں۔ بہت ہوتے ہیں اور اچھے ہوتے ہیں۔ ان کا ایک کالم پڑھا تھا۔ انہوں نے ٹی وی پر چلنے والے ایک اشتہار سے متاثر ہو کر لکھا تھا۔ اشتہار کا لب لباب یہ ہے کہ جب قیمت اچھی لگ رہی ہو تو سب کچھ بیچ دو۔ انہیں یہ لکھنے کی ضرورت نہیں تھی۔ یہاں تو بِن مول ہی بک رہے ہیں اور قوم کو بیچتے ہوئے یہ خیال نہیں کرتے کہ قیمت کیا مل رہی ہے۔ ہوشیار تاجر گھاٹے میں بھی مال بیچ دیتا ہے کہ ایک طرف تو گاہکوں میں ساکھ بنے گی دوسرے یہ کہ رقم گردش میں رہے گی،نیا مال خریدا جاسکے گا۔ پاکستان کی تاجرانہ ذہنیت رکھنے والی قیادت یہی تو کررہی ہے۔ ملک کو بیچ کر اپنی ساکھ بنا رہی ہے۔ جانے یہ کس کا شعر ہے یا کسی نے شعر میں ڈنڈی ماری ہے کہ: بھاگ ان بردہ فروشوں سے، کہاں کے حاکم بیچ ہی پائیں جو ہم جیسے گداگر پائیں قوم کی قوم گداگر ہی تو ہے اور تیسرے مارشل لا کے چیف جنرل ضیاء الحق نے کہا تھا کہ ’’گداگروں کے پاس انتخاب کا اختیار نہیں ہوتا۔‘‘(Beggars can't be choosers) بات تو سچ ہے مگر بات ہے رسوئی کی۔ مگر رسوائی کی بات تو پرانی ہوگئی۔ ٹی وی پر خبریں چل رہی ہیں کہ گداگر پشاور پر ٹوٹ پڑے، کوئٹہ کے بازاروں میں ہجوم درہجوم دامن گیر ہوتے ہیں۔ یہ ہمارے حکمرانوں کی کامیابی کا ثبوت ہے۔ یہ گداگر دکھا کر امریکا کے دل سنگ میں شاید کچھ ملائمیت آجائے۔ دوسال پہلے پاکستان نے امریکا کی خدمت کرتے ہوئے اپنے پلے سے جو رقم لگائی تھی، معاہدۂ غلامی پر دستخط ہوتے ہی ایک ارب 10 کروڑ ڈالر مل گئے۔ مبارک ہو۔ ایسے میں ماضی کے شیخ رشید یاد آگئے جو اب بجھا ہوا سگارہیں۔ پرویز مشرف نے جب سر تسلیم خم کیا تھا اور ’’چہ ارزاں فروختند‘‘ کے بجائے سب کچھ مفت میں دے ڈالا تھا تو ان کے نفس ناطقہ جناب شیخ رشید نے قوم کو خوشخبری سنائی تھی کہ ’’اتنے ڈالر آئیں گے کہ گننا مشکل ہو جائے گا۔‘‘ آئے تو ہوں گے۔ مگر گئے کہاں؟ پیاروں کے پیٹ میں؟ ہمارے حکمران تو ایک گوری کے شیریں لبوں سے نکلے ہوئے Sorry پر مر مٹے اور وہ کچھ لٹانے پر تیار ہیں جو ان کا ہے بھی نہیں۔ حکمران طبقہ سینہ چوڑا کرکے برابر یہ دعوے کیے جارہا ہے کہ اس نے سلالہ حملے کے بعد 7 ماہ تک ناٹو رسد کی فراہمی روک کر کمال کر دکھایا۔ اب بحال کرکے بھی کمال کیا گیا ہے۔ ’’نانی نے خصم کیا بُرا کیا، کرکے چھوڑ دیا اور برا کیا۔‘‘ اب تو پکا کام ہوگیا ورنہ تو سارا معاملہ زبانی چل رہا تھا۔ معاہدے پر دستخط ہوگئے۔ امریکا کی ساری شرائط مان لی گئیں۔ خون دل کی کشید، شہیدوں کے لہو کی سبیل لگا دی گئی۔ معاہدے میں کیا ہے، یہ تفصیلات تو سامنے نہیں آئیں۔ ضرورت بھی نہیں کیونکہ عوام کو جاننے کی ضرورت ہی کیا ہے۔ اب یہ تو معلوم ہو ہی گیا ہے کہ ہماری ایک نہیں مانی گئی۔ بڑے بڑے دعوے تھے کہ فی کنٹینر ہزاروں ڈالر وصول کریں گے، سڑکوں کی ٹوٹ پھوٹ کا معاوضہ طلب کریں گے، ناٹو رسد کی بحالی کے لیے امریکا کے ڈرون حملے رکوائیں گے، پہلی بار کوئی حکومت ایک سپرپاور کے سامنے ڈٹ کر کھڑی ہوئی ہے۔ صرف ایک سوری سے غبارے میں سے ہوا نکل گئی۔ امریکا کی خاردار جھاڑیوں میں الجھائے گئے دامن کو تار تار ہونے سے پہلے چھڑانے کا بہترین موقع تھا۔ علامہ اقبالؒ کو جب سر کا خطاب ملا تو اکبر الہ آبادی نے طنز کیا تھا ’’انگریز کی دہلیز پہ سر ہوگئے اقبال‘‘ انگریز کی جگہ امریکیوں نے لے لی ہے اور تمام حکمران نہ صرف سر ہوگئے بلکہ سر قدموں میں رکھ دیا اور اس پر خوشی سے پھولے نہیں سماتے۔ طوطیٔ ہند شیخ ابراہیم ذوق نے اس حالت کا نقشہ پہلے سے کھینچ کر رکھ دیا تھا کہ وقت ضرورت کام آئے گا: سر بوقت ذبح اس کے زیر پائے ہے یہ نصیب اللہ اکبر، لوٹنے کی جائے ہے ہماری دونوں طرح کی قیادت (قیادت تو اصل میں ایک ہی ہے) اپنے نصیب پر نازاں ہے اور عوام کسی مہجور اور نامراد عاشق کی طرح کہہ رہے ہیں: زلف آوارہ، گریباں چاک، گھبرائی نظر ان دنوں یہ ہے جہاں میں زندگی کا نظام اور نظام کاہے کا؟ اس سے بہتر تو نظام سقّہ تھا کہ ڈھائی گھڑی کی بادشاہت تو مل گئی تھی۔ اس میں بھی چام کے دام چلا دیے تھے۔ یہاں تو گھٹلیوں کے دام بھی نہیں ملے۔ طے یہ ہوا ہے کہ فی کنٹینر ڈھائی سو ڈالر ملیں گے۔ لینا ہے تو لو ورنہ آگے ہو۔ ناٹو کنٹینروں میں اسلحہ بھی جائے گا جو افغان فوجیوں کے لیے ہوگا۔ عبدالرحمن ملک شور مچا رہے ہیں کہ بلوچستان میں جو کچھ ہو رہا ہے وہ افغانستان کررہا ہے۔ ایک صاحب ہوتے ہیں طلعت مسعود۔ سنا ہے کہ وہ پاک فوج میں لیفٹننٹ جنرل کے عہدے سے ریٹائر ہوئے اور اب ٹی وی کے مبصر بن گئے ہیں۔ وہ غالباً انجینئرنگ کور میں تھے جس کا معرکہ آرائیوں سے عموماً کوئی واسطہ نہیں ہوگا۔ پھر بھی وہ جنگی معاملات پر اس لیے تبصرے کے لیے بلا لیے جاتے ہیں کہ لیفٹننٹ جنرل کا سابقہ لگا ہوا ہے اور آسانی سے دستیاب ہوتے ہیں۔ پاک امریکا دستاویز ذلت پر دستخط کے حوالے سے ان کی گفتگو سنی تو کہیں سے نہیں لگا کہ وہ کبھی پاک فوج کے ایک اعلیٰ عہدیدار رہے ہیں۔ ناٹو رسد کی فراہمی کے معاہدے کے حق میں ایسے ایسے دلائل دے رہے تھے کہ شاید ہی کوئی دے سکے۔ وہ بھی ہمارے حکمرانوں کی زبان بول رہے تھے کہ ناٹو رسد کی فراہمی بند کرکے پاکستان تنہا ہوگیا اور تمام ناٹو ممالک اس کے مخالف ہوگئے۔ صاف کہیے کہ پاکستان کی قیادت میں اپنے حق اور اصولی موقف کے لیے کھڑے رہنے کی ہمت ہی نہیں، ان کے گھٹنوں کی ’’مِخ‘‘ نکل گئی ہے۔ یہ عربی کا لفظ ہے اور اس میں میم پر پیش ہے لیکن پنجابی میں میم اسی طرح زیر ہوگیا ہے جیسے ہمارے حکمران امریکا کے سامنے۔ گھٹنوں کا گودا نکل جائے تو کوئی کھڑا رہنے کے قابل نہیں رہتا۔ بیٹھے تو پہلے ہی تھے کہ امریکا جڑوں میں بیٹھ گیا، اب لیٹ گئے ہیں۔ اس پر مستزاد ہمارے دانشور اور ریٹائرڈ فوجی ماہرین قوم کو درس دے رہے ہیں کہ بس لیٹے ہی رہنا۔ اٹھے تو امریکا برا حال کردے گا، عالمی برادری میں حقہ، پانی بند ہو جائے گا۔ چنانچہ ڈرون حملے بند نہیں ہوں گے۔ آئی ایس آئی کے نئے سربراہ جنرل ظہیر الاسلام امریکا کا مؤقف سمجھنے کے لیے خود امریکا چلے گئے اور اس اثنا میں معاہدہ تذلیل ہوگیا۔ بھلا کونسا ایسا ملک ہے جس کی فضائی اور زمینی حدود کی مسلسل خلاف ورزی ہوتی رہے اور وہ خوف کے عالم میں دم سادھے پڑا رہے۔ آج امریکا اور ناٹو ممالک سے ڈرایا جارہا ہے، کل کو پاکستان کی بے بسی دیکھ کر بھارت بھی یہی کرنے لگے تو کیا تب بھی ہمارا جواب یہی ہوگا کہ ’’ہمارے دل کو جفا کے تیروں کا ہوسکے تو بنائو ترکش۔‘‘ یہ بھی یاد رہے کہ بھارت کی پشت پر امریکا کا ہاتھ ہے اور وہ ہر طرح سے اسے شہ دے رہا ہے۔ وہ جو ناز کیا کرتے تھے کہ ہم امریکا کی بدمعاشی میں اس کے صف اول کے اتحادی ہیں‘انہیں یاد رکھنا چاہیے کہ اب بھارت اور امریکاایک دوسرے کے اتحادی ہیں اور پاک فوج کی حیثیت سامان ڈھونے والے مزدوروں سے زیادہ نہیں رہ گئی ہے۔ کسی بھی فوج کی اولین ذمہ داری اپنے ملک کی سرحدوں کی حفاظت کرنا ہے۔ پاکستان کی سرحدیں روز پامال ہورہی ہیں اور اب تو افغانستان میں تیار کردہ امریکی کٹھ پتلیوں کی جرأت بھی اتنی بڑھ گئی ہے کہ وہ بھی پاکستان پر حملے کررہے ہیں۔ امریکا نے 2014ء میں انخلا سے پہلے پاکستان کی گوشمالی کی تیاریاں مکمل کرلی ہیں۔ وہ افغانستان سے مکمل انخلا نہیں کرے گا اور اس کے اڈے افغانستان میں موجود رہیں گے جہاں سے ڈرون حملے بھی ہوتے رہیں گے۔ پیپلز پارٹی کے قدیم رفیق جن کو اس وفاداری کی بنیاد ہی پر برطانیہ میں پاکستان کا ہائی کمشنر بنایا گیا، وہ تک فرما رہے ہیں کہ ’’ڈرون حملے پاکستان میں جمہوریت کو کمزور اور لوگوں کو انتہا پسندی کی طرف دھکیل رہے ہیں، پارلیمان کی متفقہ قرارداد کے باوجود ڈرون حملے جاری رہنے پر عوام مذاق اڑا رہے ہیں، پاک فوج کو بے بسی کی نظر سے دیکھا جارہا ہے، مگر امریکا ہماری ایک نہیں سنتا، لوگ ہم سے سوال کرتے ہیں کہ اتنی بڑی فوج جس پر قومی بجٹ کا بھاری حصہ خرچ ہورہا ہے، وہ ہمارا دفاع کیوں نہیں کرسکتی۔‘‘ اس کے بعد انہوں نے بھی یہی راگ الاپا کہ ہم سپرپاور کا مقابلہ نہیں کرسکتے، خدا کے لیے امریکا ہماری خودمختاری کی خلاف ورزی نہ کرے۔ لیکن وہ کیوں نہ کرے۔ جب آپ خود اپنی پارلیمان کی متفقہ قرارداد کو کچرے کے ڈبے میں پھینک دیں اور غیر مشروط طور پر ناٹو رسد کی فراہمی بحال کردیں تو وہ آپ کی درخواست کیوں مانے گا۔ صرف ڈرون حملے ہی تو جمہوریت کو کمزور نہیں کررہے، جمہوریت تو صرف صدر، وزیراعظم اور ان کے ہمنوائوں کے بیانات میں نظر آتی ہے۔ فوج اپنے ہی شہدا کی قربانیوں کو نظر انداز کررہی ہے۔ یا تو آں شورا شوری، یا یں بے نمکی۔ کیسے چڑھ چڑھ کر دعوے کیے تھے۔ سلالہ میں 24 جوان ہی تو شہید ہوئے تھے۔ اس سے کہیں زیادہ اگیاری میں برف کے تودے میں دب کر جاں بحق ہوگئے اور عسکری قیادت خود برف کا تودہ بن گئی۔ جو پیسے خرچ کیے تھے وہ دو سال بعد ملے، مل تو گئے۔ اب نئے سرے سے غلامی کے اصول طے ہورہے ہیں اور یہ سب کچھ ملک وقوم کے وسیع تر مفاد میں۔ جانے یہ ملک کون سا ہے اور یہ قوم کہاںبستی ہے۔ ہم تو اتنا جانتے ہیں کہ اس رمضان میں اب تک فروٹ چاٹ نہیں بنی۔ شاید ہم تک بھی کبھی دور جام آجائے۔ چلتے چلتے جدہ میں مقیم مجاہد سید کا ایک شعر سن لیجیے: گری جب فصیل دفاع شہر، لہو کا سیل تھا ہر طرف یہاں لشکروں کی کمی نہ تھی، یہاں صرف قحط رجال تھا

KHOON KI PEYASI DUNIYA MEIN

خون کی پیا سی دنیامیں دامنِ اسلام میں آ ؤ امن عزت تحفظ پاؤ مولانا اسرارالحق قاسمی دُنیا کے مختلف حصوں سے مسلمانوںکے تعلق سے جو اند ہ ناک خبریں آرہی ہیں ، وہ صاف طورپر اس طرف اشارہ کرتی ہیں کہ پوری دنیا میں مسلمان سخت حالات سے گزررہے ہیں اور وہ ظلم وتشدد کے شکار ہیں۔ ان ممالک میں جہاں حکومتیں ان کی نہیں ہیں وہاں تو وہ مسائل ومصائب میں مبتلاہیں ہی لیکن جہاں خود ان کی حکومتیں ہیں وہاں بھی انہیں بڑے پیمانہ پر جانی ومالی نقصانات سے گزرنا پڑرہاہے۔مثال کے طورپر شام ایک مسلم مملکت ہے۔وہاں کے حکمران ،عہدیداران ، افواج اور عوام سب مسلمان ہیں۔ البتہ صورت حال گزشتہ سال مارچ سے یہ ہے کہ اس ملک میں کوئی دن ایسا نہیں گزررہا ہے جس میں درجنوںمسلمان نہ مارے جاتے ہوں۔خود شام کی افواج حکومت مخالف سروںکو کچلنے کے لئے بڑھ چڑھ کر حملے کررہی ہیں۔ عوام اور حکومت کے مابین ٹکرائو کے نتیجہ میںقریب گزشتہ ایک سال کے دوران 20ہزارافراد مارے جاچکے ہیں۔پچھلے چند ہفتوںمیں شام کے اندر جس بڑے پیمانہ پرکشت وخون کے واقعات رونما ہوئے ہیں ، ان کی روشنی میں کہا جاسکتا ہے کہ آنے والے وقت میں شام کے حالات مزید خراب ہوسکتے ہیں اورشام کے مسلمانوںکو اس سے بھی کہیں زیادہ جانی ومالی نقصان کا سامنا کرنا پڑسکتا ہے۔شام میں نظم ونسق کی صورت حال پوری طرح سے بگڑگئی ہے ،ملک میں موجوددوسرے ممالک کے لوگوںنے وہاں سے اپنے گھروں کی طرف واپسی شروع کردی ہے۔ایک رپورٹ کے مطابق شام کے 34ہزارشہریوںنے لبنان میں پناہ لے لی ہے۔اگلے چند ہفتوںمیں پناہ گزینوںنے کی تعدادمیں کئی گنا اضافہ ہوسکتا ہے۔ عراق ، لبنان، افغانستان اور مصرکے حالات میں بھی مستحکم نہیں ہیں۔ گزشتہ ایک دہائی کے دوران عراق میں 10؍لاکھ سے زیادہ مسلمان مارے جاچکے ہیں، ہنوز یہ سلسلہ جاری ہے۔ ایسے میں عراق کی ترقی تودورکی بات ، بنیادی ڈھانچہ کی درستگی کی بابت بھی سوچنا عجیب معلوم ہوتاہے۔اگر بات افغانستان کی جائے تو وہاں کے حالات بھی کچھ مختلف نظرنہیں آتے۔ ناٹو افواج کے ذریعہ افغانستان کے عوام پر مظالم کی خبریں آئے دن منظرعام پر آتی رہتی ہیں۔اس کے علاوہ افغانستان کے باشندوںکے مابین باہمی جنگ وجدال کی کیفیت بنی ہوئی ہے جس کے نتیجہ میں ہلاکتوںکا سلسلہ ہنوز تواتر کے ساتھ جاری ہے۔قتل وغارت گری سے پاکستان بھی پاک نہیں ہے۔سیاسی عدم استحکام کا معاملہ تو پاکستان میں اسی وقت سے چل رہا ہے جب سے پاکستان کا وجود عمل میں آیا لیکن اس سے بھی زیادہ سنگین بات یہ ہے کہ خود وہاں کے گروہ ، جماعتیں اور مسالک باہم دگر متصادم ہیں اور ایک دوسرے کے خون کے پیاسے بنے ہوئے ہیں۔اس کے علاوہ غیرملکی سازشوں نے بھی پاکستان کو اپنے نرغے میں لے رکھا ہے۔ڈرون حملوںمیں پاکستان کے قبا ئلی عوام کو بے دردی سے ماراجارہا ہے۔ امریکہ کے یہ ڈرون حملے صرف پاکستان تک محدود نہیں بلکہ دیگرممالک میں بھی جاری ہیں۔ پاکستان سمیت دیگر ممالک میں ڈرون حملوںکے نتیجہ میں جونقصان ہوا ہے اگر اس کا جائزہ لیا جائے تو یہ صورت حال سامنے آتی ہے کہ ڈرون حملوںمیں عوام کو زیادہ نقصان پہنچ رہا ہے۔ لیبیا میں اگرچہ انقلاب آچکا ہے،کرنل معمر قذافی کی حکومت کا خاتمہ ہوچکا ہے اور عوام سیاسی سطح پرجو تبدیلی چاہتے تھے ، وہ رونما ہوچکی ہے لیکن اس کایہ مطلب نہیں کہ لیبیااپنی سابقہ حالت یعنی امن وامان پر واپس آچکا ہے اور وہاں امن وآ شتی قائم ہے بلکہ حقیقت یہ ہے کہ لیبیا میں نہ تو ابھی استحکام ہوا ہے اور نہ ہی ابھی بنیادی ڈھانچہ کو مضبوط کیا جاسکا ہے۔ مصرکے حالات بھی اس سے کچھ مختلف نہیں ہیں۔عوامی سیلاب میں حسنی مبارک کے اقتدار کا محل بھلے ہی بہہ گیا ہواور عوامی خواہش کی بنیا د پر محمد مرسی مصر کے صدر کیوں نہ بن گئے ہوں لیکن مصر میں اتھل پتھل کا سلسلہ ابھی بھی جاری ہے ۔ فوج کی طرف سے صدر کے اختیارات کو محدود کرنے کی کوشش کی جارہی ہے۔ ایسے اشارات مل رہے ہیں کہ حکومت اور فوج کے درمیان رسہ کشی قائم ہوسکتی ہے۔ ان ممالک میں جہاں مسلمان اقلیت میں ہیں وہاں مسلمانوںکو انتہائی کربناک حالات سے گزرنا پڑرہا ہے بلکہ بعض مقامات پر تو مسلمانوں کی جان پر بن آئی ہے اور وہاں انہیں اپنا جانی، مالی ، تہذیبی، ثقافتی اور مذہبی سطح پرتحفظ دشوار ہورہا ہے۔اس کی تازہ ترین مثال میانمار کے روہنگیا مسلمانوںکی ہے جن پر عرصۂ حیات تنگ کردیاگیا ہے۔ انہیں ملک سے نکالنے کی کوششیں کی جارہی ہیں، بعض رپورٹوںکے مطابق گزشتہ دنوںوہاں ہزاروںمسلمانوںکا اجتماعی قتل کیا گیا۔ جو تصاویر منظرعام پر آئی ہیں وہ اس بات کا پتہ دیتی ہیں کہ میانمار میں دوسرے طبقات اور خود حکومت وہاں کی مسلم اقلیت کے وجود کوبرداشت نہیں کررہی ہے۔اجتماعی طورپر لاشوں کو نذر آتش کرنا، انہیں سینکنا، ان کی تصاویر لینا اس بات پردلالت کرتا ہے کہ برماکی حکومت اور وہاں کے دیگر طبقات مسلمانوںسے نا کر دہ گناہوں کا انتقام لینا چاہتے ہیں اور لے دے کے انہیں وہاںسے نکال دینا چاہتے ہیں ۔ ہمارے ملک میں بھی بعض گروہوںکی یہ کوشش ہے کہ ہندوستان کی سرزمین کو مسلمانوںکے لئے تنگ کردیا جائے۔ یہ گروہ کبھی فرقہ پرستی کی زد میں لے کر مسلمانوںکو نقصان پہنچاتے ہیں اور کبھی دہشت گردی کی آڑمیں۔ ان فسادی گروہوںکے ذریعہ ملک میں اب تک ہزاروں فسادات ہوچکے ہیں جن میں منظم طورپر مسلمانو ں پر مظالم ڈھائے گئے۔ فی الوقت فرقہ پرستوںکا قہر آسام کے مسلمانوںپر جاری ہے۔یہاں مختلف اضلاع میں مسلمانوں کاجانی ومالی نقصان ہوا۔ آسام میں جس طرح مسلمانوںکی گھیرا بندی کی گئی ، اس نے گجرات فساد کی یاد تازہ کردی جس میں ہزاروںمسلمانوںکو چن چن کرقتل کیا گیاتھا۔اترپردیش میں بھی فرقہ پرستی عروج پر دکھائی دے رہی ہے۔ غرض یہ کہ ہندوستان بھرمیں مسلمان فسادات کے شکارہیںاور سخت خوفزدہ ہیں۔ یہی وجہ ہے کہ ملک کے مسلمانوںمیںعدم تحفظ کا احساس بڑھتاجارہاہے۔ مغربی ممالک جہاں مسلمان اقلیت میں ہیں مسلمانوںپر طرح طرح کے مظالم ڈھائے جاتے ہیں۔اگرچہ مسلمان ا ن ممالک میں آباد ہیں اور ان کی تعداد بھی بڑھ رہی ہے لیکن حقیقت یہ ہے کہ وہ خو ف کی حالت میں زندگی گزارتے ہیں ۔یہ ممالک عام طورپر مسلمانوںکی معاشرت پر درپردہ حملے کررہے ہیں ۔ان ممالک میں مسلمانوں کو شک کی نگاہ سے دیکھاجاتاہے اور ان پر سختی کی جاتی ہے۔ وہاںاب ایسے قوانین بنائے جانے لگے ہیں جن سے مسلمانوںکی آزادی سلب ہوسکتی ہے اور ان کے لئے ان ممالک میں اپنے تشخص کو برقرار رکھنا دشوار ہوسکتا۔حیران کن امر یہ ہے کہ وہ مسلمان جو دنیا بھرمیں مظالم ، تشدد اور مسائل کے شکار ہیں، انہیں دہشت گرد، خونخوار، ظالم اور جابر بتایاجارہاہے۔ نائن الیون کے بعد سے اب تک اس الزام کے تحت دنیا بھر میں کروڑوںمسلمانوںکی زندگی اجیرن بنادی گئی ہے۔ہزاروں مسلمانوںکو قید کیاجاچکا ہے اور ہزاروںلاکھوںکو ماراجاچکاہے ۔ یہ صورت حال ساری دنیا کے مسلمانوںکے لئے لمحۂ فکریہ ہے ۔ ان حالات سے باہر آنے کے لئے ملت اسلامیہ کو بہت کچھ سوچنے اورکرنے کی ضرورت ہے۔مسلمانوں کو ان اسباب پر بہرحال نظرڈالنی ہوگی کہ آج وہ قعرمذلت کے شکار کیوںہیں اور اقوام عالم ان پر کیوںجھپٹ رہی ہیں؟ اسباب کو تلاش کرنے کے بعد انہیں اس صورت حال سے باہر نکلنے کا حل تلاش کرنا ہوگا۔اگرمسلمان چاہیں تویہ کام ان کے لئے بہت زیادہ مشکل نہیں ہے کیونکہ ان کے پاس دین کی روشنی موجود ہے۔ قرآن مجید اور احادیث نبوی صلی اللہ علیہ وسلم کو سامنے رکھ کر اپنے مسائل کا وہ بہتر حل تلاش کرسکتے ہیں۔مثال کے طورپر مسلمانوںمیں آج اتحاد کا فقدان پایاجاتاہے جب کہ قرآن مجید میں تمام مومنوں کو آپس میں بھائی بھائی کہا گیاہے۔آج مسلمان فکری سطح پرجمودوتعطل کے شکار ہیں جب کہ قرآن میں بار بار غوروفکر کی دعوت دی گئی ہے۔آج کے مسلمانوںمیںہمت وحوصلے اور حکمت عملی کی بھی کمی پائی جارہی ہے حالانکہ اسلام حوصلہ کی زبردست تعلیم دیتا ہے ۔ اسلام میں تعلیم کے حصول پر زوردیا گیا ہے لیکن مسلمان دیگر اقوام کی بہ نسبت تعلیم میں بہت پیچھے ہیں۔غرض اگر مسلمان نازک حالات سے باہر آنے کے لئے اسلامی تعلیمات پر عمل کریں تویقیناًانہیں کامیابی ملے گی۔ساری دنیا کے مسلمانوںکو یہ ذہن نشین رکھنا چاہئے کہ ان کے سامنے کامیابی کا اس کے علاوہ کوئی اور راستہ نہیںہے کہ وہ اسلام کی رسّی کو مضبوطی سے تھام لیںاور اپنی صفوں میں اتحاد پیدا کرلیں ۔ (نوٹ:-مضمون نگار ممبر پارلیمنٹ ہیں)

IGRF SEMINAR REPORT

غازی محمد بن قاسم ایک بہترین مدبر،منظم اور مثالی حکمران تھے

محبت وعقیدت میں غیر مسلموں نے ان کے مجسمے بنا کر پوجنا شروع کردیا  ۔ ایاز الشیخ

گلبرگہ ۔  رمضان المبارک ہمارے لیے کئی اہم تاریخی واقعات کی بنا پر بھی بڑی اہمیت رکھتا ہے۔ 17 رمضان کو جنگ بدر ہوئی جو حق و باطل کے درمیان پہلا معرکہ تھا، جس نے حق کی فتح کو راسخ کر دیا اور جس کے نتیجے میں آگے چل کر روم و فارس کی سلطنتیں بھی اسلامی پرچم کے زیر نگیں آگئیں۔ 10 رمضان کو محمد بن قاسم کی زیر کمان مسلم فوج نے سندھ کو فتح کیا۔محمد بن قاسم نے اپنی مظلوم بہن کی پکار پر لبیک کہتے ہوئے نہ صرف ان کو راجا داہر کے ظلم سے نجات دلائی بلکہ اہل سندھ کو  اسلام کے آفاقی پیغام سے روشناس کیا یہی وجہ ہے کہ سندھ کو باب الاسلام کا درجہ ملاجس کے بعد پورے برصغیر میں اسلام کی دعوت پھیلی۔ آج بھی غازی سندھ محمد بن قاسم کو سندھ کے عوام ہیرو کے طور پر یاد کرتے ہیں۔'' ان خیالات کا اظہار جناب ایاز الشیخ، چیرمین امام غزالی ریسرچ فاونڈیشن نے اے ایل سی لکچر ہال میں منعقد سیمینار کو مخاطب کرتے ہوئے کیا۔ انہوں نے کہا کہ محمد بن قاسم   کی شخصیت تاریخ اسلام میں نمایاں مقام رکھتی ہے، انہوں نے محظ 17 سال کی عمر ہی سندھ کو فتح کیا تھا، یہاں کے ڈاکو اور قزاق عرب تاجروں کو بہت نقصان پہنچاتے تھے، ان کے جہازوں پر قبضہ کرلیتے اور سامان لوٹ لیتے تھے، ایک مرتبہ ان لوگوں نے عرب کے جہازوں پر قبضہ کرلیا، مردوں ، عورتوں اور بچوں کو قید کرلیا، جب سندھ کے حاکم راجہ داہر سے ان سب کو واپس کرنے کی درخواست کی گئی ، تو قید کردہ لوگ جیل خانے میں موجود ہونے کے باوجود یہ کہہ دیا کہ جہاز لوٹنے والوں پر ہمارا بس نہیں چلتا تم خود آکر اپنے قیدیوں کو چھڑا لو اور اپنا مال واسباب حاصل کرلو، تب محمد بن قاسم93  ھ  میںچھ ہزار کا لشکر لے کر سندھ روانہ ہوئے اور اپنے اعلی اخلاق و کردار سے سندھ اور ملتان وغیرہ کو فتح کرلیا اور پورے ملک میں امن ومان اور عدل وانصاف قائم کیا، سب کو مذہبی آزادی دے دی ، حتی کہ مندروں کی حفاظت و مرمت اپنے خزانے سے کرائی، کئی نئے منادر بھی تعمیرکئے ۔ پجاریوں کو سرکاری خزانہ سے وظائف مقرر کئے ، کاشت کاروں اور کاریگروں کی مدد فرمائی، اور ہر ایک کے ساتھ برابری ، عدل وانصاف کا معاملہ کیا اور تمام لوگوں کو شہری بن کر امن و امان کے ساتھ آزادانہ زندگی گذارنے کا حق دیا۔اگر سیکیولریزم کا مطلب پرامن بقائے باہمی، تمام مذاہب کے ماننے والوں کے ساتھ برابری ، عدل وانصاف کا سلوک اور بلا لحاظ مذہب و قوم  تمام لوگوں کو شہری بن کر امن و امان کے ساتھ آزادانہ زندگی گذارنے کا حق دینا ہے ، تو یہ سب غازی محمد بن قاسم نے عملاًکردکھایا۔ وہ صحیح معنوں میں ہندوستان کے پہلے سیکولر حکمران تھے۔ معروف مصنف شیخ اکرم ان کے متعلق لکھتے ہیں:''محمد بن قاسم نے پرانے نظام کو حتی الوسع تبدیل نہ کیا۔ راجہ داہر کے وزیراعظم کو وزارت پر برقرار رکھا اور اس کے مشورے پر عمل کرتے ہوئے تمام نظامِ سلطنت ہندوں کے ہاتھ میں رہنے دیا۔ عرب فقط فوجی اور سپاہیانہ نظام کے لیے ہوتے تھے۔ مسلمانوں کے مقدمات کا فیصلہ قاضی کرتے تھے۔ لیکن ہندوں کے لیے ان کی پنچائتیں بدستور قائم تھیں''۔

                                                                                    

ایاز الشیخ نے اپنا خطاب جاری رکھتے ہوئے کہا کہ متصب مورخوں نے ہمیشہ مسلم حکمرانوں کی ظالمانہ تصویرپیش کی۔ لیکن کچھ انصاف پسند غیر مسلم مورخین نے حقیقت کو واضح کرنے کی کوشش کی۔ رما شنکر ترپاٹھی لکھتے ہیں:''سندھ کے فاتحین نے رواداری کے دور اندیشانہ پالیسی پر عمل کیا۔ اس میں شک نہیں کہ اسلام پھیلا، لیکن عیسائیوں کے گرجوں، یہودیوں کے عبادت خانوں اور آتش پرستوں کی قربان گاہوں کی طرح، ہندو مندر بھی محفوظ و مستحکم رہے۔ برہمنوں کو اجازت تھی کہ وہ چاہیں تو نئے مندر تعمیر کریں، چاہیں پرانے مندروں کی مرمت کرائیں۔ مذہبی رواداری کی اس سے زیادہ کیا صورت ہو گی کہ محمد بن قاسم نے جس طرح مسجدوں کے لیے اوقاف مقرر کیے، ویسے ہی مندروں کے لیے بھی جاگیریں مقرر کیں۔''  اسی طرح  معروف مورخ ڈاکٹر تارا چند، محمد بن قاسم کے متعلق لکھتے ہیں:اس مسلمان فاتح نے مفتوحوں کے ساتھ عقلمندی اور فیاضی کا سلوک کیا۔ مالگزاری کا پرانا نظام قائم رہنے دیا اور قدیمی ملازموں کو برقرار رکھا۔ ہندو پجاریوں اور برہمنوں کو اپنے مندروں میں پرستش کی اجازت دی اور ان پر فقط ایک خفیف سا محصول عائد کیا، جو آمدنی کے مطابق ادا کرنا پڑتا تھا۔ زمینداروں کو اجازت دی گئی کہ وہ برہمنوں اور مندروں کو قدیم ٹیکس دیتے رہیں۔''  سندھ کے عوام کی محمد بن قاسم سے محبت وعقیدت کا اندازہ اس بات سے لگایا جاسکتا ہے کہ ان کے جانے کے بعد سندھ کے غیر مسلموں نے ان کے مجسمے بنا کر ان کو پوجنا شروع کردیا ۔سابق وزیر اعظم راجیو گاندھی نے 1988 میں شامی صدر کے دورہ کے موقعہ پر بجا طور پر کہا تھا کہ محمد بن قاسم اسلام کا پیغام لیکر ہندوستان آئے انکا پیغام امن و سلامتی اور بھائی چارہ کا تھا۔

چیرمین آئی جی آر ایف نے تاسف کا اظہار کرتے ہوئے کہا کہ مسلمانوں نے اپنے ہیروز کا فراموش کردیا ہے ہماری نوجوان نسل صلاح الدین ایوبی، طارق بن زیاد، موسی بن نصیر، محمد بن قاسم، محمود غزنوی، اورنگ زیب عالمگیر، التمش، شیرشاہ سوری، ٹیپو سلطان اور دیگر تاریخی شخصیات سے نا آشنا ہے۔ تعلیمی نظام کا کیا رونا ہم نے خود ان اکابرین کی سیرت سے انہیں واقف کرانے کوئی کوشش نہیں کی۔ آج ہندوستان میں ہمارا وجود انہیں بزرگان کا مرہون منت ہے لیکن انہیں فراموش کرکے ہم احسان فراموشی کے مرتکب ہو رہے ہیں۔  آخر میں انہوں نے نوجوانوں سے کہا کہ وہ غازی محمد بن قاسم کو اپنا آئیڈئیل بنائیں ۔انکی زندگی اور کارناموں میں ہمیں اللہ پر یقین، ہمت و شجاعت، صحیح وقت پر صحیح اقدام، جن، ہوم ورک یعنی پہلے سے تیاری، اپنے سے بڑوں کی تابعداری، مذہبی رواداری، حلم اور تدبر کے سبق ملتے ہیں۔۔ مسلم خلیفہ کی تبدیلی کے بعد جب نئے خلیفہ سلیمان نے انہیں ان کے عہدے سے ہٹایا تو انہوں نے ایک سچے مسلمان کی طرح اس حکم کو قبول کیا اور اس حکم کے خلاف بغاوت کرنے کے مشورے کو رد کر دیا اور بڑوں یا ہائر اتھارٹی کی تابعداری کی مثال قائم کی۔ انہوں نے کہا کہ محمد بن قاسم نے ہمارے لئے تاریخ میں بہت اچھی مثالیں چھوڑی ہیں۔ ہمیں تاریخ سے سبق حاصل کرنا چاہئے جو ایسا نہیں کرتے وہ خود تاریخ اور آنے والی نسلوں کے لیے عبرت کا نشان بن جاتے ہیں۔ آج ہم وطن عزیز میں امن و امان ، ترقی، فرقہ وارنہ ہم آہنگی چاہتے ہیں تو اس کے لئے غازی محمد بن قاسم کی پرپرامن بقائے باہمی کی پالیسی پر عمل کرنا ہوگا۔

قبل ازیں سیمینار کا آغاز تلاوت کلام پاک سے ہوا۔ کم سن بچی عفاف نے نعت شریف کا نذرانہ پیش کیا اور کلام اقبال سنایا۔ بعد ازیں ہشتم جماعت کی طالبہ شیخہ امامہ ایازنے بزبان انگریزی محمد بن قاسم کی حیات و خدمات پر تقریر کی۔ شیخ احمد متعلم درجہ ہفتم نے محمد بن قاسم نوجوانوں کے لئے رول ماڈل کے عنوان سے بزبان انگریزی مضمون پیش کیا۔ دعا پر سیمینار کا اختتام عمل میں آیا۔

رپورٹ : محمد علی، میڈیا انچارج     IGRF