INSAN AUR HAIWAN

انسان اورحیوان

عبدالقیوم

 

انسان اورحیوان میں بہت مماثلتیں ہیں۔ مثلاً سانس لینے کیلئے ہوا کی ضرورت، زندگی کی نشوونما کےلئے پانی اور خوراک کی طلب، دیکھنے کیلئے آنکھیں، سننے کیلئے کان، انسانوں کی طرح نظام انہضام چلنے کیلئے پاﺅں، مذکر اور مو¿نث بچوں کی پیداوار، انکی خوراک کےلئے جسمانی دودھ کی موجودگی اور انکی حفاظت کی فکر وغیرہ لیکن اللہ تعالیٰ نے انسان کو عقل عطاءکرکے اشرف المخلوقات بنا دیا۔ اس عقل کے باوجود اگر انسان کا دل پتھر بن جائے اور ضمیر مردہ ہو جائے تو پھر انسان اور حیوان میں کوئی فرق نہیںرہتا۔ اپنے سیاسی، عسکری اور معاشی مفادات کےلئے جب طاقتور قوتیں اپنے ہتھیاروں کے بل بوتے پر انسانوں کو کیڑوں مکوڑوں کی طرح تلف کر دیتی ہیں تو انسانیت حیوانیت کے بدترین روپ میں سامنے آتی ہے۔

پہلی جنگ عظیم میں لاکھوں لوگ لقمہ اجل بنے۔ دوسری جنگ عظیم میں عیسائی ہٹلر نے کئی ملین یہودیوں کو گیس چیمبرز میں زندہ بند کرکے جلا دیا اور امریکہ نے جاپان کے 2 ہیروشیما اور ناگاساکی جیسے ہنستے بستے شہروں کو ایٹم بم مار کر راکھ کر دیا۔ 
آج سے تقریباً 10 سال قبل امریکہ اور اسکے اتحادی مسلمان دنیا کے گنجان آباد تاریخی شہر بغداد پر حملہ آور ہوئے۔ رات کی جگمگاتی روشنیوں میں آبادیوں، محلوں اور ہوائی اڈوں کو لیزر گائیڈڈ بموں کا نشانہ بنایا گیا، جس سے انسانی اجسام کے پرخچے اڑتے دکھائے گئے لیکن سنگ دل اور مردہ ضمیر انسانیت یہ سب کچھ ٹی وی سکرینوں پر خاموش تماشائی بن کر دیکھتی رہی۔ کسی نے احتجاج کیا نہ سلامتی کونسل میں کوئی آواز اٹھائی۔ ابوغریب اور گوانتاناموبے کی بدنام زمانہ جیلوں میں قیدیوں کو ننگا کرکے ان پر کتے چھوڑے گئے اور انسانیت سوز مظالم ڈھائے گئے۔ اس کی اگر خبر لیک ہوئی یا معمولی احتجاج سامنے آیا تو وہ بھی مغرب کی طرف سے لیکن پورا ایشیا، آسٹریلیا اور افریقی براعظموں سے اس بربریت کےخلاف کوئی آواز نہ اٹھی، نہ کسی نے سلامتی کونسل میں اس انسانی تضحیک کے خلاف کوئی احتجاج کیا۔ افغانستان میں تو انسان کے ہاتھوں انسان کی تذلیل اس وقت انتہا پر نظر آئی جب انسانی تاریخ میں پہلی دفعہ جارح افواج کے سپاہی مقامی لوگوں کے مردہ اجسام پر پیشاب کرتے دکھائے گئے۔ مقبوضہ      میں عورتوں کی عصمت دری اور پھر قتال اور اجتماعی قبریں ،فلسطین میں ہنستے مسلمانوں پر شطیلہ اور سابرا مہاجر کیمپوں میں مظالم کی داستانیں اور      میں بے گناہ عورتوں، بچوں اور بوڑھوں کی اجتماعی قبروں کا انکشاف یہ سب انسانیت کے نام پر شرمناک دھبے ہیں۔ 

 Aldous Huxley نے 1932ءمیں "Brave new world" کے عنوان سے ایک ناول لکھا تھا جس میں اس چیز پر زور دیا گیا کہ جس طرح اخلاقی اقدار برباد کی جا رہی ہیں اور انسانیت زوال کا شکار ہو رہی ہے۔ ہماری آنیوالی نسلوں کا مستقبل تاریک ہوتا جا رہا ہے چونکہ ہم Dehumanize ہو رہے ہیں۔ ناول نگار کے خیال میں مستقبل کی دنیا میں ماں اور باپ کے بغیر ٹیسٹ ٹیوب سے پیدا ہونیوالے بچے بھی عام ہو جائینگے جن کی اپنی کوئی شخصیت نہ ہو گی۔ حکومتیں انکو اپنی مرضی کے مطابق ڈھال لیں گے۔

 قارئین سوچیں کہ ٹیسٹ ٹیوب جنریشن تو دور کی بات ہے‘ ہماری موجودہ بین الاقوامی قیادت کے دوہرے معیار ہیں اور ہمارے دلوں سے انسانی جذبات بالکل مٹ گئے ہیں اور ہم واقعی Dehumanize ہو چکے ہیں۔ منافقت اس حد تک ہے کہ جانوروں سے پیار کرنیوالے انسانی جانوں کے ضیاع پر ٹس سے مس نہیں ہوتے‘ کتوں اور بلیوں سے پیار کا اظہار کرنیوالے زندہ معصوم انسانوں کا درندوں کی طرح ناشتہ کرتے ہیں اور وہ ایک لمحہ بھر کیلئے بھی اس حیوانیت پر شرمندہ نہیں۔ معافی مانگنا تو دور کی بات ہے‘ ایک اہل دل مغربی دانشور نے اگلے دن لکھا کہ چند ماہ قبل وہ ہاورڈ یونیورسٹی میں ایک کانفرنس میں شمولیت کی غرض سے گیا تو وہاں Cambridge کی ایک گلی کے کنارے کچھ طلباءسیاہ لباس پہنے اس بات پر احتجاج کر رہے تھے کہ یونیورسٹی کی سائنس لیبارٹریوں میں صحت مند بندروں کو مہلک بیماریوں کے جراثیم کا تجربہ کرکے ہلاک کر دینا ایک غیرانسانی فعل ہے، صحت مند جانوروں پر یہ ظلم بند ہونا چاہئے۔

قلم کار لکھتا ہے کہ اتفاقاً یہ 25 مئی 2012ءکا دن تھا، جس دن اقوام متحدہ کی رپورٹ کےمطابق شام کے دارالحکومت دمشق میں مغربی طاقتوں کی مدد سے لڑی جانےوالی خانہ جنگی میں 108 لوگ لقمہ اجل بنے جن میں 34 عورتیں اور آپ یقین کریں 49 بچے بھی شامل تھے۔

ایک طرف جانوروں سے ہمددردیاں اور دوسری طرف انسانوں کےخلاف درندگی، انسان کس چیز پر یقین کرے۔ قلم کار لکھتا ہے کہ وہ بدنصیب مائیں جو ان معصوم بچوں کی ہلاکت کے بعد زندہ رہتی ہیں، کیا کبھی کسی نے انکے جذبات کا اندازہ بھی لگایا ہے۔ خون میں لت پت اپنے معصوم بچوں کی لاشیں اٹھا کر وہ کتنے کرب کا شکار ہوتی ہونگی۔ وہ شاید یہ نہیں چاہتیں کہ اپنے مردہ بچوں کے خون آلود کپڑوں کو دھو ڈالیں چونکہ اس طرح ان کپڑوں سے انکے لخت جگر کے جسم کی مہک کے غائب ہونے کا خطرہ ہے۔

قلم کار لکھتا ہے کہ جب دمشق میں ایک چار سالہ بچی رافان خلیفے کے والدین کی تلاش جاری تھی، عین اس وقت امریکہ کے شہر Taxas میں اس نے یہ پوسٹر درخت پر لٹکا دیکھا۔
Lost Cat, He is white and fluffy with brown and black tabby patches answer to the name sully, 2/ found please call.
”یعنی ایک سفید رنگ کی بھاری بھرکم بلی جو کچھ بھوری اور کچھ کالی بھی ہے ،گم ہوگئی ہے۔ جس کو ملے، اس نمبر پر اطلاع کریں۔ اس کو Sully کہہ کر پکاریں تو میوں کرتی ہے۔“

آپ خود اندازہ کرلیں کہ مسلمانوں کے دنیا میں خاندان اجڑ گئے، کنبے تباہ ہوگئے، بچے بچھڑ گئے، ماں باپ قتل ہوگئے، جائیدادیں ختم ہوگئیں، بوڑھے، مرد، حاملہ عورتیں اور معصوم بچوں کا تکہ بوٹی ہوگیا لیکن انسانیت خاموش ہے۔ ہم سب تماشائی ہیں۔ بغداد ہو یا دمشق، افغانستان ہو یا پاکستان، لیبیا ہو یا برما، مغرب تو کیا مسلمان دنیا کے ضمیر بھی مردہ اور دل پتھر ہوچکے ہیں۔

مغربی قلم کار آخر میں لکھتا ہے کہ صدر اوباما کی بیٹیوں نے ایک کتا بڑے پیار سے رکھا ہوا ہے اگر اس کتے کو ان لڑکیوں کی آنکھوں کے سامنے ذبح کر دیا جائے تو ان پر کیا گزرے گی۔ 20 جولائی کو امریکہ کے ایک سنیما گھر میں 12 بے گناہ امریکی ہلاک ہوئے تو امریکہ کا قومی پرچم سرنگوں ہوگیا اور امریکی صدر مقتولین کے گھر افسوس کیلئے پہنچ گیا لیکن شام اور برما کی قتل و غارت کی اس کو کوئی پرواہ نہیں۔ کیا مسلمانوں کا خون حیوانوں سے بھی سستا ہے؟

اللہ کرے مغربی دنیا کی قیادت دوہرے معیار ختم کر دے اور حیوانیت کی بجائے انسانیت کو ترجیح دے۔ عراق کی جنگ میں حصہ لینے والے ایک امریکی سپاہی Matt Southworth نے 4 اگست 2012ءکو اپنے خیالات کا اظہار ایک مضمون میں کیا ہے جس کا عنوان ہے "Human Dignity. A casualty of War" امریکی سپاہی کے مطابق امریکہ کی افغانستان میں دس سالوں سے لڑی جانیوالی جنگ بالکل بے سود ہے۔ میٹ جو امریکی انٹیلی جنس ایجنسیوں میں بطور تجزیہ نگار کام کرتا رہا ہے‘ لکھتا ہے کہ عراق اور افغانستان میں سینکڑوں ایسے لوگوں کو ہم نے قیدی بنایا جو بالکل بے گناہ تھے۔ ان میں سے بہت سارے اگر امریکی فوج کے حق میں نہیں تو مخالف بھی نہیں تھے۔ بہت سے بزرگ لوگوں کو جنہیں ہمیں انکل کہہ کر عزت دینا چاہیے تھی‘ ان کو ہم نے انسان بھی نہ سمجھا۔ اسی طرح ڈرون حملوں سے ہم نے تباہی مچائی اگر صدر بش نے 12 حملے کئے تو اوباما نے 329 حملے کئے اور 2004ءسے اب تک 2365 لوگ ہلاک ہو گئے جن میں بہت سارے بے گناہ لوگ اس لئے مارے گئے کہ وہ غلط وقت پر غلط جگہ پر تھے۔ امریکی فوجی دانشور جس نے خود عراق جنگ میں حصہ بھی لیا تھا‘ لکھتا ہے:
"We could not see these (civilian) prisoners as uncles, fathers and mentors. Rather we came up with a slew of derogatory names for Iraqis. We treated them as less than people. losing our humanity as we robbed them of theirs"
(ہم ان قیدیوں کو چچا‘ باپ‘ یا بزرگ سمجھنے کے بجائے ان کو برا بھلا کہتے تھے‘ ہم نے ان کو انسان نہ سمجھا اور اپنی انسانیت بالکل اسی طرح کھو دی جیسے انکی انسانیت پر ہم نے ڈاکہ ڈالا۔

MYNMAR KE MUSALMAN

میانمارکے مسلمان

شاہ نواز فاروقی 

-دنیا میں مسلمانوں کا سب سے بڑا جرم یہ ہے کہ وہ ’’مسلمان‘‘ کیوں ہیں۔ وہ اللہ اور اس کے رسول پر ایمان کیوں رکھتے ہیں؟ وہ قرآن کو دستور حیات کیوںکہتے ہیں؟ وہ اپنی تہذیب اور تاریخ سے کیوں وابستہ رہنا چاہتے ہیں؟ ایسا نہ ہوتا تو دنیا کے ہر ملک میں اقلیتیں ہیں اور اکثر جگہوں پر اقلیتیں پھل پھول رہی ہیں۔ مگر مسلمان جہاں اقلیت میں ہیں وہاں ظلم کی چکی میں پس رہے ہیں۔ فلسطین‘ اسرائیل‘ بوسنیا ہرزیگووینا‘ کشمیر‘ بھارت‘ سری لنکا‘ امریکا‘ یورپ‘ روس‘ چین‘ غرضیکہ اقلیت کی حیثیت سے مسلمانوں کے لیے کہیں جائے پناہ نہیں۔ لیکن میانمار یا برما کے مسلمانوں کا المیہ عجیب ہے۔ اس مسئلے کا المناک ترین پہلو یہ ہے کہ دنیا کیا خود جنوبی ایشیا کے مسلمانوں کو معلوم نہیں کہ میانمار کے مسلمان کون ہیں؟ وہ میانمار میں کہاں آباد ہیں۔ ان کی نسل کشی کب سے ہورہی ہے۔ میانمار کے مسلمان روہنگیا کہلاتے ہیں اور وہ میانمار کے مغربی صوبے اراکان میں آباد ہیں۔ اراکان عربی لفظ ’’رکن‘‘ سے نکلا ہے جس کے معنی ستون کے ہیں۔ اراکان کی آبادی 1990ء کے اعداد وشمار کے مطابق 40 لاکھ ہے جس میں 30 لاکھ مسلمان اور باقی دس لاکھ افراد مگھ بدھسٹ اور قبائلی لوگوں پر مشتمل ہیں۔ ارکان کا رقبہ 20 ہزار میل ہے۔ روہنگیا مسلمان عربوں‘ ترکوں‘ ایرانیوں‘ مغلوں‘ پٹھانوں اور بنگالیوں کی نسل سے ہیں اراکان میں مسلمانوں کی آمد 7 ویں صدی میں شروع ہوگئی تھی۔ اس وقت ارکان کا نام روہنگ تھا اور اس بنیاد پر ارکان کے مسلمان آج بھی روہنگیا کہلاتے ہیں۔ اس علاقے میں اسلام تیزی سے پھیلا اور 1430ء میں روہنگیا مسلمانوں نے اپنی سلطنت قائم کرلی۔ جس کے سربراہ شاہ سلیمان تھے۔ لیکن شاہ سلیمان کو برما کے بادشاہ منگی نے اقتدار سے محروم کردیا۔ اس کے بعد علاقے میں مسلمانوں کا اقتدار مختلف مراحل سے گزرا لیکن 1531ء میں زبک شاہ نے ایک بار پھر اراکان میں مسلم سلطنت کی بنیاد رکھی۔ یہ ہر اعتبار سے ایک مثالی سلطنت تھی جس میں بدھ اقلیت کو کامل مذہبی آزادی تھی اور مسلمان بادشاہ مسجدیں بناتے تھے تو اس کے ساتھ بدھوں کی عبادت گاہیں بھی قائم کی جاتی تھیں۔ لیکن 1784ء میں برما کے بادشاہ بودا پھایا نے مسلم سلطنت کا خاتمہ کردیا۔ مساجد سمیت مسلمانوں کی تمام علامتوں کو مٹانے کی ہرممکن کوشش کی گئی۔ سیکڑوں مسلمان شہید کردیے گئے ۔ وہ دن ہے اور آج کا دن ہے مسلمانوں کے دین‘ ان کی تہذیب اور تاریخ کے خلاف سازشوں کا سلسلہ جاری ہے۔ روہنگیا مسلمانوں کی حالیہ تاریخ پر نظر ڈالی جائے تو 1949ء سے اب تک میانمار کے مسلمانوں کے خلاف 14 فوجی آپریشن ہوچکے ہیں جن میں 1978ء کا آپریشن اس اعتبار سے بدترین تھا کہ اس کے نتیجے میں 3 لاکھ روہنگیا مسلمان بنگلہ دیش میں پناہ لینے پر مجبور ہوئے۔ تاہم روہنگیا مسلمانوں کے خلاف تازہ ترین آپریشن بھی کم ہولناک نہیں اس آپریشن میں 300 مساجد بند کردی گئی ہیں۔ درجنوں بستیاں جلاکر خاکستر کردی گئی ہیں۔ میانمار میں اب تک مجموعی طور پر 20 ہزار سے زیادہ مسلمان شہید ہوچکے ہیں۔ سیکڑوں مسلمان جیلوں میں قید ہیں جن کی کوئی داد ہے نہ فریاد۔ اس صورتحال میں روہنگیا مسلمان خاموش نہیں بیٹھے رہے۔ 1947ء میں جعفر حسین قوال نے روہنگیا مسلمانوں کی مسلم جدوجہد کی بنیاد رکھی اس تعلق سے روہنگیا مسلمان انہیں آج بھی ’’مجاہد اعظم‘‘ کہتے ہیں۔ جعفر حسین قوال کو قوال اس لیے کہا جاتا ہے کہ وہ مجاہدین کے لیے چندہ جمع کرنے کے لیے قوالیاں بھی گالیا کرتے تھے۔ تاہم 11 اکتوبر 1950ء کو انہیں گولی مار کر شہید کردیا گیا۔ روہنگیا مسلمانوں نے پرامن سیاسی جدوجہد کا راستہ بھی طویل مدت تک اختیار کیا لیکن یہ راستہ بھی روہنگیا مسلمانوں کے مسائل کا حل فراہم نہ کرسکا اور آج صورتحال یہ ہے کہ مسلمان میانمار کی سب سے بڑی اقلیت ہیں مگر سیاسی میدان میں کسی سطح پر ان کی کوئی نمائندگی نہیں ہے۔ لیکن سوال یہ ہے کہ روہنگیا مسلمانوں کا اصل المیہ کیا ہے۔؟ روہنگیا مسلمانوں کا اصل المیہ یہ ہے کہ وہ 7 ویں صدی سے اراکان میں موجود ہیں مگر میانمار کا قانون کہتا ہے کہ جو لوگ 1823ء کے بعد میانمار میں آئے ہیں انہیں میانمار کا شہری تسلیم نہیں کیا جاسکتا۔ دنیا یہودیوں کے اس حق کو تسلیم کرتی ہے کہ وہ ڈھائی ہزار سال بعد آکر فلسطین پر اپنا حق جتا سکتے ہیں اور اس پر قبضہ کرکے ریاست قائم کرسکتے ہیں مگر میانمار کے حکمران میانمار کے مسلمانوں کو ایک صدی کی رعایت دینے کے لیے تیار نہیں۔ نتیجہ یہ ہے کہ میانمارکے مسلمان نہ میانمار کے شہری ہیں نہ بنگلہ دیش انہیں اپنا شہری تسلیم کرتا ہے۔ میانمار کے حکمرانوں نے مسلمانوں کی زندگی کتنی دشوار بنائی ہوئی ہے اس کا اندازہ اس بات سے کیا جاسکتا ہے کہ میانمار کے مسلمانوں کو ایک تھانے کے حدود سے دوسرے تھانے کی حدود میں جانے کے لیے بھی اجازت نامے کی ضرورت ہے۔ وہ آزادی کے ساتھ شادی بیاہ بھی نہیں کرسکتے۔ انہیں شادی کے لیے درخواست دینی پڑتی ہے جوکہ برسوں متعلقہ سرکاری اہلکاروں کے پاس پڑی رہتی ہے۔ میانمار کے حکمران جب چاہتے ہیں مسلمانوں کو مساجد میں عبادت اور مذہبی تعلیم کے حق سے محروم کردیتے ہیں۔ وہ مساجد اور وقف کی املاک کو جلادیتے ہیں۔ منہدم کردیتے ہیں‘ یا ان پر تالے ڈال دیتے ہیں۔ میانمار بدھسٹوں کا ملک ہے اور بدھ ازم میں چڑیا کو مارنا بھی ’’حرام‘‘ ہے اس لیے کہ بدھ ازم کسی بھی جاندار کو کسی بھی حال میں مارنے کی اجازت نہیں دیتا۔ لیکن مسلمانوں کے سلسلے میں بدھ ازم کی ساری تعلیمات غیرموثر ہوگئی ہیں اور مسلمانوں کے حوالے سے میانمار کے حکمرانوں کو مہاتمابدھ کی کوئی تعلیم یاد نہیں آتی۔ میانمار کے حکمران تواتر کے ساتھ کوشش کرتے رہتے ہیں کہ مسلمانوں کے لیے حالات اتنے دشوار بنادیے جائیں کہ وہ میانمار چھوڑنے کو زندگی کا سب سے بڑا مقصد بنالیں۔ میانمار کے مسلمان صدیوں بالخصوص گزشتہ ساٹھ سال سے نسل کشی کی زدمیں ہیں مگر ان کا مسئلہ نہ اقوام متحدہ میں موجود ہے۔ نہ اس پر اوآئی سی کے کسی اجلاس میں کبھی کوئی بات ہوئی ہے۔ نہ وہ سارک کے فورم پر کبھی زیر بحث آیا ہے۔ یہاں تک کہ وہ بین الاقومی ذرائع ابلاغ میں بھی کہیں موجود نہیں۔ اس کا نتیجہ یہ ہے کہ میانمار جیسا معمولی ملک بھی میانمار کے مسلمانوں کے لیے ’’سپرپاور‘‘ بن گیا ہے۔ وہ نہ انسانی حقوق سے متعلق کسی ادارے کے اہلکار کو اپنے یہاں آنے دیتا ہے۔ نہ ذرائع ابلاغ کے نمائندوں کو میانمار کا ویزا دیا جاتا ہے۔ چنانچہ میانمار کے مسلمان ’’مکمل تنہائی‘‘ میں زندگی بسرکررہے ہیں۔ انسان دکھ اور تکلیف سے نہیں مرتا مگر ناامیدی اسے چار دن میں ہلاک کردیتی اور امت مسلمہ کے حکمرانوں‘ رہنمائوں اور رائے سازوں نے اراکان کے مسلمانوں کو نظرانداز کرکے ناامیدی کی دلدل میں دھنسنے کے لیے چھوڑ دیا ہے۔ اس کا اندازہ اس بات سے کیا جاسکتا ہے کہ پاکستان میں میانمار کے مسلمانوں کی نسل کشی کی اطلاعات آئیں تو جماعت اسلامی کے سوا کسی بھی جماعت کو اس پر احتجاج کی توفیق نہیں ہوئی۔ پاکستان کے ذرائع ابلاغ کم وبیش دوہفتے تک اس طرح خاموش رہے جیسے انہیں بھی معلوم نہ ہو۔ معمولی معمولی باتوں پر ’’بریکنگ نیوز‘‘ دینے والوں کو میانمار کے مسلمانوں کی حالت زار پر کوئی نیوز ’’بریک‘‘ کرنے کی توفیق نہ ہوسکی۔ میانمار کے حکمرانوں نے مسلمانوں کے قتل عام کا جرم کیا اور بے شمارلوگوں نے قتل عام پر خاموش رہنے کے جرم کا ارتکاب کیا۔ nn

ASSAM - INSANIYAT KO AWAZ DE RAHA HAI

 

Courtesy Etemad Hyd

ASAM WO BURMA KE MUTASSERIN AUR HAMARA FAREEZA

 

Courtesy: Munsif Hyd

مسلم نوجوان میدان عمل میں آئیں

ماہِ رمضان مبارک میں تباہ حال مسلمانوں کی دست گیری ضروری
مسلم نوجوان میدان عمل میں آئیں

     بین الاقوامی سطح ہو کہ ملکی سطح۔ ہر چہار طرف امت مسلم ایک زبردست عبران سے گذر رہی ہے۔ اغیار، اسلام اور مسلمانوں کو ہر طرح کا زخم دینے کے لیے کیا کچھ نہیں کررہے ہیں۔ آج کا سپر پاور امریکہ و اُس کے حمایتی یوروپین حلیف ممالک مذہب اسلام اور مسلمانوں کے خلاف سب ساتھ ساتھ ہیں۔ ایسے میں اسرائیل کیوں تماشائی بنا رہے۔ اک طرف دشمنان اسلام کا اسلام اور مسلمانوں کے خلاف یہ بہیمانہ رویہ دوسری طرف بذات خود اسلام کے ماننے والے۔ اک کلمہ توحید کے ماننے والے، جغرافیہ، وطن، نسل، مسلک، زبان کے نام پر آپس میں سر پھٹول کر کے، جگ ہنائی کا سامان مہیا کررہے ہیں۔ جنہیں میرکارواں بننا تھا۔ وہ گرد کارواں بنے ہیں۔ آج بدقسمتی سے ہمارے ملک ہندوستان میں، مسلمانوں کی جو حالت ہے۔ جو کربناکی و اذیت سے بھرپور ہے۔ اس کا مداوا ہونا ضروری ہے۔ دوسری جانب برما میں لاکھوں مسلمان دُکھ، تکلیف، اذیت جھیل رہے ہیں۔ ہزاروں مسلمان ہتہ تیغ کردیے گئے۔ بھر گھر ہوئے۔ پڑوس میں مسلم اکثریت والا بنگلہ دیش ملک بھی انہیں پناہ دینے کو تیار نہیں۔ ہمارے ملک یوپی اور آسام میں، انسانیت پسندی کی دعویدار صوبائی اور مرکزی حکومت ہونے کے باوجود مسلمانوں پر بڑی افتاد آپڑی ہے۔ 2002ئ کے گجرات کے بھیانک فرقہ وارانہ فسادات میں، جس قدر مسلمان بے گھر نہیں ہوئے تھے۔ پناہ گزیں کیمپوں میں نہیں تھے۔ تقریباً 4لاکھ مسلمان پناہ گزیں کیمپوں میں، آج آسام میں پناہ لیے ہوئے ہیں۔ دہشت گردی کے نام پر بے معصوم مسلمانوں کی گرفتاری کا سلسلہ رکتا نہیں۔ کتنے ہی معصوم بے گناہ مسلمان مہینوں برسوں جیل و قید کی زندگی گذارنے کے بعد رہا ہورہے ہیں۔ اُن کے خلاف پولس کے جھوٹے ثبوت عدالت کے سامنے ٹک پاتے ہی نہیں۔
    ماہِ رمضان کا مبارک مہینہ جاری و ساری ہے۔ سارے مہینوں میں انتہائی فضیلت کا مہینہ ہے۔ اس مہینہ میں عبادت و نیکی کا اجر، اللہ کے یہاں کسی اور مہینے سے زیادہ ہے۔ مسلمان اک مسلمان کا بھائی ہے۔ اُن مسلمانوں کی فکر کرنا اور عملی مدد و تعاون کرنا ہمارا فرص اولین ہے، جو انتہائی دردناک دور سے گزر رہے ہیں۔ جو فرقہ وارانہ فسادات کا شکار ہیں۔ گھروں سے بے دخل کردیے گئے۔ جو نان وجوین کو ترس رہے ہیں۔ بدن پر کپڑے نہیں، ناتواں و ضعیف ہیں ،کہ معیاری دوائیں نہیں۔ بلا وجہ گرفتار کیے گئے ہیں۔ اُن کا اور اُن کے گھر والو ںکا کوئی پرسان حال نہیں۔
کرو مہربانی اہل زمین پر
خدا مہربان ہوگا عرش بریں پر
    آج مسلمان، پورے ہندوستان میں جس دور سے گذر رہا ہے۔ وہ انتہائی بربریت، ظلم و ستم کا دور ہے۔ اسلام میں مایوسی کفر ہے۔ ہمت کی ضرورت ہے۔ ظلم و بربریت کے یہ بادل انشاء اللہ چھٹ جائیں گے۔ پیارے نبیۖ نے فرمایا ''بھوکوں کو کھانا کھلائو، بیماروں کی عیادت کرو اور جو لوگ ناحق قید کرلیے گئے ہیں اُن کیرہائی کی کوشش کرو۔'' (مسلم) اسی طرح اللہ نے فرمایا ''اے محبوب تم فرمادو کہ لوگو!  اگر تم اللہ کو دوست رکھتے ہو، میرے فرمانبردار ہوجائو۔ اللہ تمہیں دوست رکھے گا اور تمہارے گناہ بخش دے گا۔ ہم مسلمانوں کو اللہ کی خوشنودی حاصل کرنا ہے۔ اُس کے قریب ہونا ہے تو پیارے نبیۖ کے فرمانبردار ہونا ضروری ہے۔
    آج سائنس کی بے پناہ ترقی کی بناء پر پوری دُنیا سمٹ کر گویا اک کمرے میں آچکی ہے۔ خبروں کے متعدد ذرائع انتہائی تیزی کے ساتھ خبروں کو اک جگہ سے دوسری جگہ ساعتوں میں پہنچا دیتے ہیں۔ آج جس قدر پوری دُنیا کی معلومات، جس قدر تیزی کے ساتھ ، تفصیل کے ساتھ مل جاتی ہیں۔ ایسا پہلے کبھی نہ تھا۔ پوری دُنیا اور ہندوستان میں مسلمانوں کا کیا حال ہے۔ وہ اچھی طرح سے موجودہ سائنسی ذرائع سے مل جاتا ہے۔ یقینا پوری دُنیا اور بذات خود ہندوستان میں مسلمانوں پر جو افتاد ، تکالیف ، پریشانیاں ہیں لگتا ہے پہلے کبھی نہ تھی۔ ایسے پرآشوب دور میں ہم مسلمانوں کو اپنے اُن مسلم بھائیوں کو اکیلے بے یار د مددگار نہیں چھوڑنا ہے۔ آج یوم اعمال ہے۔ کل یومِ حساب (قیامت کا دن) ہوگا۔ ہمارے ہر اعمال کا حساب کتاب یوم حساب (قیامت) کو ہوگا۔
    پیارے نبیۖ نے فرمایا:  کہ جو مسلمان کسی دوسرے مسلمان بندے کو کسی ایسے موقع پر بے مدد چھوڑے گا جس میں اس کی عزت پر حملہ ہو اور اُس کی آبروُ  اُتاری جاتی ہو تو اللہ تعالیٰ اس کو بھی ایسی جگہ اپنی مدد سے محروم رکھے گا۔ جہاں واللہ کی مدد کا خواہشمند (اور طلب گار) ہوگا اور جو (باتوفیق مسلمان) کسی بندے کی ایسے موقع پر مدد اور حمایت کرے گا جہاں اس کی عزت و آبرو پر حملہ ہوتو اللہ تعالیٰ ایسے موقع پر اس کی مدد فرمائے گا۔ جہاں وہ اُس کی نصرت کا خواہش مند (اور طلبگار) ہوگا۔ (سنن ابی دائود)
    نوجوان کسی بھی قوم و معاشرے کا پیش قیمت اثاثہ ہوتے ہیں۔ مسلمانوں کے اس پرآشوب دور میں مسلم نوجوانوں پر بڑی بھاری ذمہ داریاں عائد ہوتی ہیں۔ ہمیں یقین ہے کہ اس ماہِ رمضان میں مسلم نوجوان بڑھ چڑھ کر نماز  روزہ کی پابندی کے ساتھ
    آسام ، یوپی، برما کے بے آسرا، بے یار و مددگار مسلمانوں کی درمہ درمہ سخنے بڑھ چڑھ کر مدد کریں گے۔ نیز وہ معصوم مسلمان جو بے گناہ جیلوں میں قید ہیں اُن کی رہائی کے لیے نمایاں عملی اقدامات کریں گے۔ نیز اُن کے افراد خانہ کی دست گیری میں آگے رہیں گے۔ تاریخ اسلام باصلاحیت مسلم نوجوانوں کے کارناموں سے بھری پڑی ہے۔

سمیع احمد قریشی
میٹ والی چال، روم نمبر68، دادا صاحب پھالکے روڈ، دادر، ممبئی
فون نمبر:  9323986725

ادارۂ فلاح الدارین بارہمولہ خدمات واصلاحات کا عنوانِ جلّی ہے

ادارۂ فلاح الدارین بارہمولہ خدمات واصلاحات کا عنوانِ جلّی ہے خالق پرویز  جدیددنیا کے ہر معاشرے اور سماج میںغیر سرکاری بنیادوں پرایسی رضا کارتنظیمیں اور ادارے مصروف ِعمل ہیں جو سماج کے نادار،بے آسرا اور مفلوک الحا ل ضر ورت مندوں کی امداد واعانت کر کے اپنا انسانی فریضہ انجام دیتے رہتے ہیں اور یوں اپنے لئے دونوں جہانوں کی سرخروئی کا سامان پیدا کرتے ہیں۔اس سلسلے میں یہ شعر اپنے اندر معانی کا ایک دنیا سموئے ہوئے ہے  ؎ دردِ دل کے  واسطے  پیدا کیا  انسان کو ورنہ طاعت کیلئے کچھ کم نہ تھے کروبیاں  ان ہی غیر سرکاری تنظیموں کی فہرست میں دردِ دل رکھنے والی ایک تنظیم کا نام ہے’’ادارہ فلاحـــــــ الدارین‘‘ ہے۔یہ شما لی کشمیر کے ضلع بارہ مولہ میںنوجوانوں کی ایک فعال تنظیم ہے جو اپنے سرگرمیوںکے حوالے سے جھلملاتی اور جگمگاتی کہکشاں دکھائی دے رہی ہے۔ اللہ کی تو فیق سے اس تنظیم کی کار کردگی کو دیکھ کر یہاں کے با شعور عوام کو اس جماعت سے بڑی توقعات وابستہ ہیں۔ ادارہ فلاح الدّارین کے نام سے بننے والی یہ تنظیم قصبہ کے اعلیٰ تعلیم یافتہ،اسلام پسند ملازمین، دیندار تاجرین اور طلبہ و طالبات کے دم خم سے رواںدواں ہے،جو سب مل کرادارے کے اصلاحی اور فلاحی کا م انجام دینے میں پیش پیش رہتے ہیں ۔ ما شاء اللہ اس سے وابستہ مخلص نو جوانوں کے کردار میں نہ کسی قسم کا جھول ہے اور نہ ہی وہ کسی مخصوص مسلکی خول کی تنگنائیوں میںبند ہو کر ڈیڑھ انچ کی مسجد کی چہار دیواری میں خود کو گرفتار کئے ہوئے ہیں۔ بس یہ نو جوان خدا کی رضا اور معاشرے کی اصلاح کے لئے میدان میں آئے ہیں۔ شکر ہے کہ آ ج کے اس دور پر آ شوب میں ان پا ک نفوس میں جذبۂ ہمدردی، للٰہیت اور دین پسندی نہ صرف عیاں و بیاں ہے بلکہ پاکیزہ زندگی کی ہر جہت میں دن کے اجالے کی طرح ان کا  اصلا حی کام بھی نمایاں ہے۔ فلاح الدّارین اپنے ارد گردکے معاشرے میںبلا تمیز مذہب و ملت ،ذات پات اور رنگ و نسل لو گو ں میں خوشگوار تعلقات اُستوار کرنے اور معاشرے کو تمام برائیوں سے پاک و صاف کرنے ، منشیات کی لت میں ملوث نوجوانوں کواُس لعنت سے چھٹکارا دلانے اور اخلاقی بندشوں کی پٹری سے اُترنے والے بر گشتہ افراد کوپٹری پر واپس لانے کے لئے حتی المقدورر کام کررہا ہے ۔ دو نو ں دنیا ؤ ں کی بہتری اوراسلامی تہذیب کواپنی اصل روح کے ساتھ زندہ رکھنے کے لئے فلاح الدّارین مرد و خواتین کے ہفتہ وار چھوٹے بڑے اجتما عات منعقد کر تا رہتا ہے اور اس طرح عامتہ الناس تک اسلام کا آفاقی پیغام امن و انسانیت پہنچانے میں اپنا رول نبھا رہا ہے۔ان اجتماعات میں جہاں مسلمان کثرت سے شرکت کرتے ہیں،وہاں ہندو، سکھ اور عیسائیوں کے نمایندے بھی وقتاًفوقتاً شریک ہوتے ہیںاوران حوالو ں سے تنظیم کے اصلاحی اور فلاحی کاموں کی سراہنا کرنے میں رطب اللسان رہتے ہیں۔بارہ مولہ میں یہ واحد رضا کار تنظیم ہے ،جس کے اسٹیج پرہر مذہب کے دانشور،سر بر آوردہ شخصیات اور سول سو سائٹی کے جانے مانے لوگ آ کر جہاں باہمی بھائی چارہ کو فروغ دینے او ر معاشرے میں ہر قسم کے مخرب الاخلاق عادات و اطوار کا قلع قمع کرنے اور سماج کے پسماندہ جاتیوں کے مسائل و مشکلات کو انسانی بنیادوں پرحل کرنے پر زور دیتے ہیں ،وہیں ہر طبقۂ فکر بارہمولہ میں انسانی بنیادوں پراس ادارے کے ذریعے تواتر کے ساتھ کام انجام پانے کو وقت کی ایک اہم ضرورت سے بھی تعبیر کرتے ہیں۔   اﷲ کے یہ پُر اسرار بندے اپنے قصبہ اور مضافات کی بستیوں میں مفلوک الحال،نادار اور بے آسرا سماج کے تڑپتے اور بِلکتے افراد کی بلا تمیزِ دین و دھرم مالی معاونت کا بار اُٹھائے ہوئے ہیںاور کمال تن دہی سے بیمار انسانیت کے رِستے ناسوروں پر پھاہا رکھنے کا نیک کام انجام دیتے ہیں۔ یعنی اگر کوئی شہری خواہ وہ کسی مذہب یا ذات برادری سے تعلق رکھتا  ہو، خدانخواستہ کسی ایسے مرض میں مبتلا ہوجس کے علاج کی وہ طاقت نہ رکھتا ہو ،ادارہ اُس کا علاج ومعالجہ کرانے میں پیش پیش رہتا ہے۔ ادارہ یہ کام محض اللہ کی خوشنودی، رسول ؐ کی اتباع اور آخرت کی کا میا بی پانے کے لئے مستقل بنیادوں پرانجام دے رہا ہے۔ اس ادارے کو چلانے کے ما لی وسائل میں بارہمولہ اور اس کے گرد ونواح میں رہنے والے وہ سینکڑوں مخیّرحضرات اور صاحب دل اصحاب کی داد ودہش پر منحصر ہیں جن کے سامنے اس ادارے کے وہ جملہ فلاحی کام واضح ہیں جن سے بارہمولہ کا معاشرہ مختلف عنوانات سے مستفیدرہا ہے۔ یہ امر بھی بلا اشتباہ ہر ذی شعور پرواضح ہے کہ اس نیک دینی وانسانی جذبہ کے آ فتاب پر آ ج تک کسی قسم کی سیاست یا گروہی وطبقاتی  مفادات کے بادل نہ چھا گئے اور ادار ہ کسی کا دُم چھلا نہ بنا…تمام سیاسیات اور ذاتیات سے بالاتر ہو کرادارہ کو عوام میں محض اپنے بے لو ث کام کی بنا پر بہ نظر استحسان دیکھا جا رہا ہے ۔  یہ ہو نا بھی چا ہیے کیو نکہ یہ ادارہ کسی مخصوص سیاست کا بھو نپو بجا کرمستقبل میں نہ کسی مخصوص سیاست کا میدان مارنے کادلدادہ نظر آتا ہے اور نہ ہی اس کے ارکان میں رائج الوقت سیاست سے کوئی دور کا بھی واسطہ ہے۔بس یہ خدا کی اس زمین پر اللہ کے اُس آفاقی پیغام کو سماج کے ہر انسان تک پہنچانے کی تگ و دو میں مصروف نظر آتا ہے ،جو پیغام دنیائے انسانیت کے فلا ح وصلا ح کے واسطے اللہ کے آخری نبیؐ کے ذریعے  عالم انسانیت کو عطا کیا گیاہے۔  اس ادارے کے کئی شعبے سرگرم عمل ہیں۔ہر شعبہ دوسرے شعبے سے معنوی طور جُدا نہییں البتہ حدود کار متعین ہیں ۔کوئی شعبہ دین کا صحیح مقلّد بننے کے لئے تشہیر و تبلیغ کرتا ہے،کچھ اراکین معاونین بن کرسوسائٹی کے نا دار لوگوں کی دلجو ئی کرتے ہیںاورکچھ ایک سماج کے بے روزگار افراد کے روز گار کا بندوبست کرتے ہیں،کوئی شعبہ ایسے برگشتہ جوانوں کو راہِ راست پر لانے میں جُٹا ہواہے ،جو مخرّب ا خلاق برائیوں میں ملوث ہو کراپنے والدین اور سماج کے لئے دردِ سر بنے ہوئے ہو ں۔ اس حوالے سے یہ بات ڈنکے کی چوٹ کی کہی جاسکتی ہے کہ بفضل تعالیٰ بارہمولہ میں اس ادارے نے گزشتہ پانچ برس کے دوران دو سو سے زیادہ ایسے جوانوں کو خوش قسمتی سے منشیات کی لت سے نجات دلانے میں ایک قابلل اعتناء کام کیا ہے۔ یہ نوجوان یا تو غلط سوسائٹی کے سبب منشیات کے شکار ہو گئے تھے یا بے روز گار ہونے کی بنا پر اپنا غم غلط کرنے کے نتیجے میں نشے کے عادی بن گئے تھے۔اس کام میں ادارے کے اراکین کو ڈسٹرکٹ ہسپتال کے ڈاکٹروں نے بھی کونسلنگ کے ذریعے شاندار رہنما ئی کی۔ اپنے قصبہ سے منشیات کا قلع قمع کرنے کے لئے اس ادارہ نے ’’ڈرگ اڈیکشن ‘‘کا شعبہ قائم کر رکھا ہے جس نے آج تک لا ئق تحسین کام انجام دیا ہے۔ بارہمولہ کا یہی وہ خیراتی ادارہ ہے جو سال میں کم از کم چار بار بلڈ ڈونیشن کیمپ لگانے کا اہتمام کرتا ہے۔ یو ں ضلع ہسپتال میں ایسے مریضوں کی جان بچانے کاکام آ سان ہوتا ہے،جن کو جان کے لالے پڑگئے ہوتے ہیں۔یہی وہ ادارہ ہے جو اپنے قصبہ اور اس کے گرد و نواح میں رسوماتِ بد کے بے جا اسراف کا خاتمہ کرنے کے لئے سرگرم ہے ۔یہ بتا نے کی شاید ضرورت نہیں کہ شادی بیاہ کے مقدس رشتے کو یہی رسومات قبیحہ اوررواجات نا پسندیدہ غریب والدین اور ان کی با لغ اولادوں کے لئے وبالِ جان بنا رہے ہیں ۔اس معاشرتی وبا کو دور کرنے کے لئے ادارہ نے شعبۂ سماجی خدمات کے تحت ’’نکاح کونسلنگ سیل‘‘ کا قیام عمل میں لایا ہے جس کے ذریعے ادار ہ شرعی حدود کے اندرتمام بدعات اور اسراف سے اجتناب کرتے ہوئے شادیاں بھی کراتا رہتا ہے۔اس ادارہ کا ایک اور شعبہ بڑا ہی قابلِ توجہ ہے جو’’ کیرئر کونسلنگ‘‘ کے نام سے موسوم ہے ۔اس شعبہ کے ذریعے ملّت کے تعلیم یافتہ اور غیر تعلیم نو جوانوں کو اُن کا مستقبل سنوارنے کے لئے کیرئر کی کونسلنگ کی جاتی ہے تاکہ وہ سماج میں ایک کامیاب شہری کے طور پر اپنی پہچان بنانے میں کامیاب ہو جائیں۔ یہ ادارہ سماج میں صالح فکر پیدا کرنے کے لئے اکثر مساجد اور کھلے میدانوں میں اجتماعات اور جلسے منعقدکراتا رہتا ہے جس میں مرد و خواتین کے بیٹھنے کے لئے الگ انتظام کیا گیا ہوتا ہے۔ان اجتماعات میں سب سے زیادہ متاثر کُن وہ منظر ہو تا ہے جس میں بولنے والے علماء ،خطیب اور دانشور ہر مسلک سے تعلق رکھنے والے ہوتے ہیں ۔ اور اس خوشگوار طرزعمل سے واعتصمو بحبل اللہ جمیعاًًوّ ولا تفرقو کا سماں بندھ جاتا ہے۔ ادارہ فلا ح الدارین نے ۱۹۱۰ء ؁ میں چلنے والی طویل ہڑتال میں بے کار ہونے والے لوگوں میں پانچ ماہ کے دوران اللہ کی توفیق سے۱۶ لاکھ روپے تقسیم کر کے بارہ مولہ میں ایک بڑے بحران کو ٹال دیا۔ا ن دنو ں چونکہ حا لات بے قابو تھے، اس لئے ادارے نے خصوصی طورہسپتال میں زیرعلاج مریضوں اور اُن کی عیادت کرنے والوں کی طرف خصوصی تو جہ دی ۔ اس کام میں اس ادارے نے قصبہ کے کھاتے پیتے گھرانوں کا ایثار قابل تعریف رہا۔ اس ادارے کو اپریل ۲۰۱۱ ء تا جون ۲۰۱۲ ء تک عطیات،خیرات ،زکواۃ اورامداد کی صورت میں مبلغ/= 62,62239 روپے وصول ہوئے۔ اسی مدت کے دوران مبلغ57,40715/= روپے مختلف امدادی کاموں میں خر چ ہوئے۔ادارے کے مقررہ مدات پر صرفہ کرنے کا یہ سلسلہ اب تک جاری و ساری ہے۔ یہ تنظیم اصل میں ۹۰ء کے پراضطراب حالا ت میں معر ض وجود آ ئی ۔ اس کے قیام کا فوری محرک یہ بات بنی کہ اس پیچیدہ  فضا میں خیراتی ادارے اور مذہبی جماعتیں  یک بہ یک سماج سے کٹ گئی تھیں۔جب عام لو گ وقت کا جبر سہتے سہتے گھور اندھیروں میں بھٹک رہے تھے۔ اُس وقت بارہ مولہ کے یہ مٹھی بھر اسلام پسند نوجوان  محض فی سبیل اللہ حالا ت کے متا ثرین کی کما حقہ امداد کے سلسلے میں میدان میں کو د پڑے۔ انہوں نے لو جہ اللہ سماج کے تئیں بے لو ث خدمت گزاری کا جذ ب وجنو ں اپنے کمزور شانو ں پر اللہ کی تا ئید وحما یت سے لاد کر اور بنا کسی دنیو ی مفاد کے فلا حی مشن کا بیڑا اُٹھایا۔شکراللہ کا کہ تادم تحریریہ اپنے مشن کی آ بیاری میں صرف ایک اللہ کے واحد سہا رے سے آگے بڑھ رہے ہیں، انہیں سرد و گرم چشیدہ بزرگوں کا ساتھ اور رہنما ئی بھی مہیا ہے۔ ادارہ نے ۲۰۱۰ ء  میں اپنے دس سالہ سفر کے دوران مختلف پڑاؤ طے کئے اور بڑے انہماک کے ساتھ اپنی کار کردگی میں مزید تاثیراور چاشنی پیدا کر نے کی راہ پر برابر گامزن ہے۔ اس صبرآ زما سفر کے دوران ادارے سے جو بھی کمیا ں کو تا ہیاں رہیں ہو ں یا غلطیا ں سرزد ہو ئی ہو ں، خدا وندکریم ان کو معاف فرمائے۔۔اﷲ تعالیٰ اس ادارہ کے نوجوانوں کو نورِ بصیرت عطا کرے اور پیروں کا اُستاد بنا دے!  ………… رابطہ نمبر :  ۵۶۴۹۱ ۹۸۵۸۳ Courtesy Kashmir Uzma - Srinagar

AMAN DUSHMAN AMERIKI SAMRAJ - KRISHN DEV SETHI

امن دشمن امریکی سامراج فتن وفساد سے بھر ی دنیا پہ کس کا راج؟؟ کامریڈ کرشن دیوسیٹھی ہے وہی ساز کہن مغرب کا جمہوری نظام جس کے پردوں میںنہیں جُزاز نوائے قیصری                                      اقبالؔ اس وقت عراق، افغانستان اور فلسطین وغیرہ میں جنگ اور جارحیت کے شعلے بھڑک ہی رہے ہیںجب کہ شام میں خون ریز خانہ جنگی جاری ہے ۔ اس سب کے پیچھے امریکی سامراج کی کرم فرمائی ایک عیاں وبیاں حقیقت ہے جو اپنے حقیرمفادات کے لئے اقوام متحدہ کو حسب سابق استعمال کر کے دمشق کے خلاف تحت براہ راست مسلح بیرونی مداخلت کے ضمن میں زور دار کوششوں میں مصروف ہے۔ امریکی سامراج اور سامراجی میڈیا شام میںانسانی حقوق کی پائمالی کا شور کچھ اس طرح مچارہاہے جیسے ان کے دل میں ساری انسانیت کا درد اترا ہو اور یہ بذات خود دودھ کے دھلے ہو ں۔ اس دکھا وے اور مگر مچھ کے ان آ نسو ؤں میں جذ بۂ خلو ص یاہمدردی کی مٹھاس گندھی ہوئی نہیں بلکہ یہ صاف طور دکھا رہا ہے کہ شام کے افسوس ناک حالا ت دیکھ کر ان کے منہ سے سامراجی مفادات کی رال ٹپک رہی ہے ۔ اس بات سے انکا ر نہیں کہ شامی صدر بشار الا سدکی سرکار کچھ فاش غلطیاں کر رہے ہوں لیکن اس زمینی حقیقت کو نظر انداز نہیں کیا جا سکتا کہ بنیادی طورپر سامراجی یلغار کی وجہ دمشق کی طرف سے امریکی سامراج اور اسرائیل کے مکروہ عزائم کی مزاحمت ہے۔ جس طرح لیبیامیں کرنل قذافی اورعراق میں صدام حسین کی حکو متو ں کے خلاف انسانی حقوق کی پائمالی کے خلاف واویلا کرکے بیرونی مسلح مداخلت کی راہ ہموار کرکے ان ممالک میں امریکی غلبہ قائم کیاگیا، اسی طرح کے سازشی ہتھکنڈے شام میںآ زما ئے جار ہے ہیں اور اگر یہ جا رحیت پسندانہ سلسلہ سامراجی ایجنڈے کے عین مطابق جارہی رہا تو اس کے بعد ایران کی باری آ نی ہی آ نی ہے۔ بہرصورت جدید دنیامیں مختلف تضادات اور تنا زعات کے پس منظر میں امریکی سامراج کے عزائم بدکی جانکاری حا صل کر نا اور دنیامیں مختلف برسر پیکار قوتوں کے توازن کو ذہن نشین کرنا اشد ضروری ہے۔  کامریڈ مائوزے تنگ نے ’’تین دنیائوں‘‘ کاتصور پیش کیاتھا اور کہاتھا کہ دنیابھر کے عوام کومتحدہ ہوکر پہلی دنیا یعنی بڑی سامراجی طاقتوں کے خلاف جدوجہد کرنی چاہے۔ دنیا اسی تصور کے مطابق گھوم رہی ہے۔  موجودہ عالمی صورت حال کوصحیح طورپر سمجھنے کے لئے مناسب ہوگا کہ کرئہ ارض زمین کی تین دنیائوں میں تفریق اور دنیا میں تین بڑے متضاد نظریات کا مختصر ساجائزہ لے لیاجائے۔  پہلی دنیا: جب تین دنیائوں کی تفریق کا نظریہ پیش کیاگیاتھا۔ اس وقت سوویت یونین اورا مریکہ دو بر تر طاقتیں تھیںجو ایک دوسرے کا گلا کاٹنے کے لئے گتھم گتھا تھیں اور سرگرمی سے نئی جنگ کے لئے تیاری کررہی تھیں۔ یہ صورتحال پہلی دنیا کی تشکیل کرتی تھی۔یہ دنیاسب سے بڑے بین الاقوامی ظالم، جابر ، جارح ، استحصال کے شیدائی اور دنیا کی تمام اقوام کے مشترکہ دشمن کے طورپر وجود میںآچکی تھی۔ دونوںبلا کو ں کے درمیان دشمنی لازماً نئی عالمی جنگ کی طرف لے جارہی تھی۔ دونوں میںعالمی برتری یاچودھراہٹ کا سکہ جما نے کے لئے عالمی لڑائی تمام ملکوں کے لئے خطرہ بنی ہوئی تھی۔سوویت یونین اب زوال پذیر ہوچکی ہے۔ اب صرف امریکہ ہی سپر پاور کی حیثیت سے باقی ہے جو بدستور ایک خطرہ ہے اور عوام اس کے خلاف مزاحمت کررہے ہیں ۔یہ آج کی عالمی سیاست کے لئے ایک  درد سر والامسئلہ بن چکاہے۔  دوسری دنیا:   ترقی یافتہ ممالک جاپان، یوروپ، اور کنیڈا درمیانی سیکشن کا تعلق دوسری دنیا سے ہے۔ یہ ملک تیسری دنیا کی مظلوم اور مجبور قوتوں پر ظلم وجبر کرتے ہیں اور ان کااستحصال کرتے ہیں۔ جب کہ امریکہ اور اس وقت کی سوویت یونین دوسری دنیا کے ملکوں کو بھی ڈراتے دھمکاتے اور کنٹرول کرتے تھے لیکن سوویت یونین کے زوال کے بعد امریکہ واحد سپر پارو کی حیثیت سے انہیں اب بھی ڈراتا دھمکاتا رہتاہے اور کنٹرول کرتاہے۔ لہٰذا دوسری دنیا کے ملکوں جاپان، یوروپ اور کنیڈا کا کردار دوغلہ ہے۔ ان کا تضاد پہلی اور تیسری دنیا کے ساتھ بنتاہے لیکن پھر بھی وہ ایک طاقت ہیںجنہیں اپنی طرف جیتا جاسکتاہے یا جن کے ساتھ سپر طاقت امریکہ کے خلاف جدوجہد میں اتحاد کیا جاسکتاہے۔ تیسری دنیا:  ہم تیسری دنیا ہیں۔ تیسری دنیا ایک بہت بڑی آبادی کی دنیاہے۔ سوائے جاپان کے ایشیاء کا تعلق تیسری دنیا سے ہے۔ سارا افریقہ تیسری دنیا میں ہے، لاطینی امریکہ بھی۔ چین اوردیگر مظلوم و مجبور قومیںجو دنیا کی گنجان ترین آبادی والی قوموں میں شمار ہوتی ہیں اور نہایت بری طرح استحصال زدہ ہیں اسی تیسر ی دنیا کی تشکیل کرتی ہیں۔ سوویت یونین کے علاوہ مشرقی یوروپ کی ریاستوں کے زوال کے بعد طاقت کے توازن کاجھکائو زیادہ تر امریکہ کی طرف بڑھ گیاہے اور اب برتر طاقت امریکہ کے خلاف عالمی جدوجہد میں تیسری دنیا سب سے اہم قوت کی حیثیت سے آمنے سامنے کھڑی ہے۔  دنیا میں تین بڑے تضادات:۔ کامریڈ لینن نے جن تین بڑے تضادات کا ذکر کیاتھا وہ اب بھی دنیا میں تین بڑے تضادات ہیں۔ ان میں سے اصل یا بنیادی تضاد کی جونشاندہی کی گئی تھی وہ درج ذیل ہے:۔ (۱)۔ سرمائے اور محنت کے درمیان تضاد (2) ۔سامراجی طاقتوں کے مابین تضاد (3) ۔سامراج اور دنیا کے مظلوم ومجبور عوام اور قوموں کے درمیان تضاد۔ تین بڑے تضادات میں سے آخری تضاد اصل تضاد ہے لیکن کیا ان تضادات میںکوئی تبدیلی آئی ہے؟ یا آج کی دنیامیں یہ تضادات کس طرح کام کررہے ہیں؟ اس حوالے سے ہی جب ہم مغربی ممالک کی حقیقت پر ایک نگاہ ڈالتے ہیں توبس یہی بات سمجھ میں آتی ہے کہ( اگر کوئی نوآبادیاتی یا نیم آبادیاتی ملکوں کی بات کرتاہے تو کرنے دیجئے ) وہاںکے محنت کش طبقے پر نہایت منصوبہ بندی اورمنظم طریقے سے حملہ کیاجارہاہے۔ سماجی بہبود ، سلامتی اور پنشن یا اسی طرح کے دیگر فوائد محنت کش طبقے کو فیاضیانہ تحائف کے طورپر نہ دئے گئے تھے بلکہ یہ عشروں کی انتھک جدوجہد اور جانفشانی کے بعد حاصل کئے گئے تھے۔ اب ہرشیٔ حملوں کی زد میں ہے۔ موجودہ حقوق پرحملے ہورہے ہیںاورنام نہاد نئی معیشت ( اصل میںنئی مشقت) محنت کش طبقے کے حقوق خواہ وہ کتنے ہی معمولی کیوں نہ ہوں، واپس چھیننے کے لئے برسرپیکارہے ۔  مشرقی دنیا کے عوام کے ایک خاصے حصے کو یہ امیدتھی کہ ان کا مستقبل ڈالر اور یورو کے باعث روشن ہوجائے گا۔ سامراجی مجرموں نے غربت اور بے روزگاری سے فائدہ اٹھاکر اقلتیوں کے خلاف بدترین شکل کے تشدد کو ایجاد کیا۔ (جس طرح بھارت کے مغربی صوبہ گجرات میںمسلمانوں کاقتل عام کیاگیا) لیکن آپ دیکھ سکتے ہیں کہ ایسے واقعات اب ماضی کا قصہ بننا شروع ہوگئے ہیں۔ زندگی اپنے آپ کو منوارہی ہے۔ مشرقی یوروپ کا محنت کش طبقہ جس نے مغرب کو فریبِ نظر کے باعث قبول کرلیاتھا۔ اسے اب حقیقت کا سامنا کرنا پڑرہاہے اور محنت بالمقابل سرمایہ کا تضاد جاری ہے۔  ۲۔سامراجی طاقتوں کے درمیان تضاد:۔ ساری دنیا کو باور کرایاگیاہے کہ سوویت یونین کے زوال کے بعد سردجنگ ختم ہوچکی ہے۔ سامراجی طاقتوں کے درمیان کوئی تضاد باقی نہیںرہاہے۔ گویا سب کچھ مختلف ہے اوریکساں بھی، جس طرح برطانیہ من مانی سے انکل سام کی پیروی کرتاہے۔ اگرایسا ہی ہے تو پھر نیٹو کی توسیع کاکیا مقصدہے؟ یورو فوج جس کی بعض ممبران نے ابھی کمزور تجویز پیش کی ہے اور جس کی تیاری ابھی حقیقت سے بہت دور ہے ، اس کی وجہ تسمیہ کیا ہے ؟ یوروپین یونین کے لئے فرانس اور جرمنی کے درمیان کیا رشتہ ہے؟ یورو جس کابہت چرچاکیاگیاہے یوروپ کے سارے ملکوں نے اسے قبول کیوںنہیںکیا؟ شک پرستوں اور سٹہ بازوں نے نیٹو کی توسیع کے سلسلے میں اوباما اور پیوٹن کے درمیان معاہدے کے متعلق اپنے تجزئے کے ذریعے پہلے سے ہی ہوا خراب کرناشروع کردیا ہواہے لیکن یہ’’ معاہدۂ کچھ لو اورکچھ دو‘‘ اصل میں کیا ہے ؟ روس کے ساتھ معاہدے کرنے کی ضرورت کیوںپیش آئی؟ صرف اس معاملے میں ہی نہیں بلکہ کئی دیگر صورتوں میں بھی ایسے معاہدے کئے گئے ،جب کہ سوویت یونین کے زوال کے بعد روس بہت کمزور ہوچکاہے۔ یا یہ اس حقیقت کی وجہ سے ہوا کہ روس اب بھی دو برترایٹمی طاقتوں میںسے ایک ہے۔  مختصراً سامراج کا مطلب ہے جنگ ، اس لئے جب تک سامراج باقی ہے جنگ کا خطرہ بھی باقی ہے اور یہ جب اپنے انتہائی عروج کی شکل میں عیاں نہیںہوتا تب بھی کمزور صورت میں اپنے مقامی خدمت گاروں کے توسط سے قائم مقام جنگیں جاری رکھتاہے ۔ بعض اوقات یہ ممکن ہے کہ وہ یا ان میںسے کچھ ساز بازکرلیں لیکن سامراجیوں کے آپس میں تعلقات میں لڑائی جھگڑے کو بنیادی خدو خال کی حیثیت حاصل ہے۔ گو 1980اور 1970کی طرح مقابلے کی صورت کو جوفوقیت حاصل تھی اب نہیںہے لیکن سامراج طاقتوں کے مابین ابتدائی تضادہر طرح سے موجود ہے۔ ۳۔جدید دنیا میں اہم ترین اصل تضاد اب بھی وہی ہے جس کی نشاندہی کئی عشرے قبل کی گئی تھی یعنی ایک طرف ساری دنیا کے مظلوم و مجبور عوام اور اقوام اور دوسری طرف امریکی سامراج کی سربراہی میں دیو ہیکل سامراجیت ۔ کہاجاتاہے کہ یوگو سلاویہ اور کا سوؤ کے خلاف جنگ گزشتہ صدی کی آخری جنگ اور افغان جنگ نئے ملنیٔم میں پہلی صدی کی پہلی جنگ ہے لیکن کیا یہ سچ ہے؟ اگر ایسا ہے تو پھر تمام تر فلسطینی عوام اور فلسطینی قوم کے خلاف نسل کشی کی جنگ کو کون سی جنگ کہنا چاہیے ؟اسے کون جاری رکھے ہوئے ہے؟پوری دنیا جانتی ہے کہ اسرائیل کی پشت پناہی اولاً امریکی سامراج اور پھر اس کا چھوٹا حصہ دار برطانیہ بک رہاہے۔ آئے دن عالم گیر یت کی سامراجی منشا کی سرگرم طرفداری کرنے کے لئے ۔ یواین او (یونائٹیڈنیشن ) ڈبلیو ٹی ٹی او ، ڈبلیو بی، آئی ایم ایف جیسے سیاسی اور اقتصادی ادارے موجود ہیں۔ سیاسی اور اقتصادی جارحانہ جنگ کے نام پر اب جارحانہ فوجی کاروائی میںاضافہ کرنے کے بعد اسے برقراررکھنے اور مزید پھیلانے کے مقصد سے عالمی دہشت گردی کے خلاف جنگ کے نام پر اب جارحانہ فوجی کاروائی کا سلسلہ جاری ہے۔ ورلڈ ٹریڈ سینٹر اور پینٹاگن کے گیارہ ستمبر کے واقعات کے بعد انہیں فرضی بہانے کے طورپر استعمال کرتے ہوئے مکار امریکی سامراجی ،متکبرانہ اور گستاخانہ انداز میں بتارہے تھے :اگر تم ہمارے ساتھ نہیں توپھر تم’’ دہشت گردوں‘‘ کے ساتھ ہو، لہٰذا تم پر حملہ کر نا واجب ہے۔ وہ ریاستیں یا قومیں جو ان کے ڈاکو اور لٹیرے پن کی مخالفت کرتی ہیں ان پر ’’بدمعاش‘‘ ریاستوں کا لیبل چسپاں کردیا جاتاہے۔ چاہے وہ عراق ہویا شام ہو،شمالی کوریا ہویا کیوبا ہو یا ایران ہو۔گزشتہ صدی کے پچاس ویں اور ساٹھ ویں عشرے میں ان کی’’ مقدس‘‘ جنگ کمیونزم کے خلاف تھی اور موجودہ’’ مقدس جنگ دہشت گردی‘‘ کے خلاف ہے۔ امریکی سامراج دنیا کے عوام کادشمن نمبر ایک ہے۔ سوویت یونین کے خلاف اس نے عالمی کر تا دھرتا بننے کے لئے ’مسلم اتحاد ‘ کا ایجاد کیا۔ پاکستان کے توسط سے برسر پیکار جہادی عناصر کو خبر کئے بغیر بڑے فنکارانہ انداز میں اپنا تابع فرمان بنایالیکن فلسطین میں امریکہ کے کردار نے تمام دنیا میں غصے کی آگ کوبھڑکایا اور بن لادن سعودی عرب سے امریکی فوج کے نکل جانے پر افغانستان میںپائپ لائن کے منصوبہ سے کمائے جانے والے منافع میں حصہ داری کا مطالبہ کرنے لئے امریکہ کی نظرمیں ’’راکھشس‘‘ خیال کئے جانے لگے۔ ان کی مخالفت کرنے کے لئے پاکستان پر تو دبائو ڈالا اور خوف زدہ کیاجاسکتاتھا لیکن اس کے برعکس سعودی عرب جو مشرقی وسطیٰ میں امریکی مفادات کے لئے کیمپ مرید کی حیثیت رکھتاہے ، نے ایک مرتبہ انہیں سعودی عرب سے باہر نکال دیاتھا، نے بھی فلسطین میں امریکہ کے کردار کی کھلی مخالفت کی۔ کیا سعودی عرب کے حکمران طبقے کا کرداراب بدل گیاتھا؟ نہیں، بلکہ حقیقت یہ ہے کہ فلسطین میںامریکہ کے جرائم کے خلاف عرب عوام کا مزاج نہایت ہی تندوتیز ہے ،اس لئے سعودی حکومت کوعوام کی آنکھوں میں دھول ڈالنے کے لئے یہ پوزیشن لینی پڑی۔ گیارہ ستمبر کے واقعات کے بعد امریکہ کے برسر اقتدار طبقے کی طرف سے امریکی قوم کے ضمیر پر ’’معتصب قومی پرستی‘‘ کے خوب تازیا نے برسائے گئے لیکن چند مہینوںکے بعد امریکی دارالحکومت میں سے زیادہ لوگ احتجاج کے لئے جمع ہوئے۔ اسی طرح چالیس ہزار لوگوں نے فرانسسکو میں فلسطینیوں  کے حق میں مظاہرہ کیا۔ سامراج اپنی نشوونما کے دوران نئی شکلیں اور صورتیں اختیار کرتاہے۔ کرۂ ارض پر عوام الناس ایک بہت بڑی تعداد پر جبرا ً اور ان کااقتصادی سیاسی اور ثقافتی اورفوجی طورپر استحصال کرنے کے لئے واحد عالمگیر ریاست کی شکل میں نمود (گلوبلائزڈسٹیٹ) جدوید دور کے سامراج کی خاص علامت بن چکی ہے۔ دنیا جہاں ایک طرف دوسری عالمی جنگ کے آس پاس جمہوری تحریک اور قومی آزادی کی لہر اور دوسری جانب سرد جنگ کے دور میںسامراج کے مابین دشمنی سے متاثرہوئی تھی ، اب امریکی سامراج کی (دوسری قوموں پر) بالاداستی کے جال میںپھنس چکی ہے۔ انفارمیشن ٹیکنالوجی پر اجارہ داری کے ذریعہ نمایاں اقتصادی استحکام ، خاص کر امریکی سامراج کی دوسرے اہم سامراجی ملکوں پر فوجی برتری ،کثیر القومی مالیاتی سرمائے کا قومی سرمائے اور تیسری دنیا کی معیشت پر کنٹرول نیز عالم گیر پیمانے پر ثقافتی مداخلت کی بوچھاڑ وغیرہ دیگر ممالک پر بالادستی برقراررکھنے کے اسباب ہیں۔ اس فاشسٹ وضع قطع کے امریکی سامراج کی اساس سنگین نظریاتی بحران پرکھڑی کی گئی ہے۔ سامراجی سرغنے اب قرون وسطیٰ کے بے بصریت وجبریت کی تقلید وحمایت سے حکومت کرناچاہتے ہیں۔  آج کے سائنسی دورمیں اوباما کی طرف سے نام نہاد دہشت گردی کے خلاف نام نہاد صلیبی جنگ کا اعلان سامراج کے نظریاتی بحران کی گہرائی کو واضح کرتاہے۔ اس نئے گلوبلائزڈ سامراج کی انسانیت کی ترقی کے نئے دور کے طورپر تشہیر کسی بھی سطح سے کیوں نہ کی جائے ؟اَن گنت زندہ حقائق ،تجربے اور عمل نے یہ ثابت کردیاہے کہ یہ تنگی اور قابل نفریں قسم کی نوآباد کاری کے سواکچھ نہیں۔ نوے کے عشرے کے بعد غربت کے تیز کردہ عمل کے جال میں پھنسنے کے بعد دنیا کے عوام کی اکثریت کا معیار زندگی گر چکاہے۔ تیس ہزار بچے جو ابتدائی علاج سے بچائے جاسکتے تھے، روزانہ موت کے منہ میں چلے جاتے ہیں۔ عوام الناس کی بہت بڑی تعداد ناقص غذا کے باعث صحت کے مسائل سے دوچار ہے۔   ان میںسے اکثریت ان کی ہے جو بمشکل چالیس سال کی عمر کوپہنچتے ہیں۔ تیسری دنیا کے بے شمار بچے، غلام بچوں کی حیثیت سے دو وقت کی روٹی کا بندوبست کرنے کے لئے کام کرنے پرمجبورہیں۔ روزانہ ہزاروں اور لاکھوں کی تعداد میں نوجوان لڑکیوں کو عصمت فروشی کی طرف دھکیلا جارہاہے۔ نوجوانوں کی بے روزگار اکثریت ’’گلوبلائز ڈمزدور منڈی‘‘ میں ذریعۂ معاش کی تلاش میں مارے مارے پھررہی ہے۔ اس طرح انفرادیت پسندی اور آزاد خیالی کا نیا عالمی نظام صر ف اس حقیقت کی غمازی کرتاہے کہ یہ نظام پوری دنیا کے عوام کی ایک بہت بڑی اکثریت کو ایک ہی کڑھائی میںتلنے کے عمل کو تیز کرتا چلاآرہاہے۔ ایک اور پہلو جو قابل توجہ ہے یہ ہے کہ امریکی سامراج کی گلا بلائزڈسٹیٹ ( جس کی افزائش دنیا کے ایک سو چالیس ممالک میں فوجی اڈے قائم کرنے کے باعث ہوئی ہے) قدرتی طورپر عالم گیر مزاحمت اور بغاوت کو معیار کے لحاظ سے لازمی اور ممکن بناچکی ہے ۔آج کسی بھی جمہوری یا قومی آزادی کی تحریک کا دنیا کے کسی بھی ملک میںکامیاب ہونا ممکن نہیں تاوقتیکہ یہ عالمی عوام کی مزاحمت کا لازم وملزوم حصہ بن کر آگے نہ بڑھے۔ ریاست ہائے متحدہ امریکہ کے عوام سے لے کر دنیا کے ان تمام براعظموں تک جنہیں گلوبلائز ڈسامراج کے اس قسم کے جبر، جارحیت اور استحصال کا نشانہ بنایاجارہاہے، عراق میں نئے ویت نام کی حیثیت سے افزدوگی پانے والی مزاحمت اور افغانستان سے لے کر نیپال ،انڈیا ، پیرو،ترکی کی اور فلپائن کی انقلابی تحریکوں تک عوامی احتجاج کی زنجیر تک اور امریکہ سے لے کر یوروپ تک عوام کی بڑھتی ہوئی بے چینی، امریکی سامراجی اور اُس کے ایجنٹ اورصرف مقامی حکمران ہی ہر کہیں عوام کے مشترکہ دشمن ثابت ہوئے ہیں۔ تاہم آج کی دنیاکافیصلہ ایک طرف امریکہ سامراج کے ہاتھوںمیں کیا جارہاہے۔ (جو گلوبلائیز ڈریاست کی صورت میں آگے بڑھ رہاہے) اور دوسری طرف ا س کے خلاف عالمی جدوجہدہے۔ بہر حال اکیسویں صدی میںعالمی  فیڈریشن کے تصور کی نشونما تک اور اس کے جھنڈے تلے عوامی تحریکیں اورہر ملک کی قومی آزادی کی جدوجہد کا آغاز آج کی اشد ضرورت ہے۔  بہر صورت آخرپہ ہم امریکی سامراج کو مائوزے تنگ کے الفاظ میں کاغذی شیر سمجھتے ہیں اور اس سلسلہ میں علامہ اقبال کے فکرانگیزاشعار کو دوہرانا چاہتے ہیں  ؎ زمانہ آیا ہے بے حجابی کا عام دیدار یارہوگا سکوت تھا پردہ دار جس کا وہ راز اب آشکارہوگا  چلاگیاہے وہ دورساقی کہ چھپ چھپ کے پیتے تھے پینے والے  بنے گا سارا جہاں میخانہ ہر کوئی بادہ خوارہوگا دیار مغرب کے رہنے والو! خدا کہ بستی ودکان نہیں ہے  کھرا  جیسے تم سمجھ رہے ہو وہ اک دن زر کم عیار ہوگا تمہاری تہذیب اپنے خنجر سے آپ ہی خود کشی کرے گی  جو شاخ نازک پہ آشیانہ بنے گا ناپائیدار ہوگا میں ظلمتِ شب میں لے کے نکلوںگا اپنے درماندہ کاروراںکو  شررفشاں ہوگی آہ میری نفس میرا شعلہ بار ہوگا  krishandevsethi@gmail.com